“Kosova të anëtarësohet në NATO”, tre kongresmenë amerikanë propozojnë rezolutën

Tre kongresmenë amerikanë kanë paraqitur në Dhomën e Përfaqësuesve një rezolutë që synon të forcojë mbështetjen politike për anëtarësimin e Kosovës në NATO. Nisma është prezantuar nga kongresistët Keith Self, Ritchie Torres dhe Mike Lawler, të cilët kërkojnë që integrimi i Kosovës në Aleancën Veri-Atlantike të shihet si prioritet strategjik për stabilitetin e Ballkanit.

Në tekstin e rezolutës theksohet se Kosova ka ndërtuar institucione demokratike funksionale, ka vendosur kontroll civil mbi forcat e sigurisë dhe ka ruajtur modelin e bashkëjetesës multietnike. Sipas autorëve, këto elemente përbëjnë një bazë të fortë për avancimin drejt NATO-s.

Rezoluta argumenton se në një periudhë kur “forcat kundërshtare” vazhdojnë të përpiqen të destabilizojnë rajonin, anëtarësimi i Kosovës në NATO do të shërbente si faktor parandalues dhe si garanci për të shmangur tensione të reja në Ballkan. Një tjetër pikë e rëndësishme e dokumentit është fakti se katër vende anëtare të NATO-s, si Greqia, Rumania, Sllovakia dhe Spanja ende nuk e kanë njohur Kosovën, çka shihet si pengesë direkte për përparimin e saj drejt anëtarësimit.

Për këtë arsye, rezoluta u bën thirrje këtyre shteteve që të rishqyrtojnë pozicionet e tyre, duke e cilësuar njohjen e Kosovës si të domosdoshme për të mbyllur një “boshllëk strategjik” në Europën Juglindore, i cili mund të shfrytëzohet nga aktorë armiqësorë. Kongresmeni Keith Self ka deklaruar se Kosova ka treguar përkushtim të vazhdueshëm ndaj stabilitetit rajonal dhe përafrimit me politikat e NATO-s, por progresi i saj mbetet i bllokuar për shkak të mosnjohjes nga disa aleatë.

Ai ka shtuar se SHBA duhet të ushtrojë ndikim diplomatik për të inkurajuar Greqinë, Rumaninë, Sllovakinë dhe Spanjën që t’i hapin Kosovës një rrugë më të qartë dhe më të besueshme drejt anëtarësimit. Rezoluta thekson gjithashtu se përfshirja e Kosovës në NATO do të ishte në interes të drejtpërdrejtë të sigurisë kombëtare amerikane, duke forcuar praninë dhe stabilitetin e aleancës në një zonë që historikisht ka qenë e ndjeshme ndaj krizave.

Foto: AP

Ndërkohë, ekspertët rikujtojnë se procesi i anëtarësimit në NATO kërkon konsensus të plotë të të gjitha vendeve anëtare dhe për këtë arsye mosnjohja e Kosovës nga katër shtete mbetet pengesa kryesore. Pavarësisht kësaj, Kosova vazhdon bashkëpunimin e ngushtë me SHBA-në dhe partnerët euro-atlantikë në fushën e sigurisë, ndërsa mbetet e hapur mundësia që në rrethana të jashtëzakonshme të ndodhin përshpejtime të procesit, siç ka ndodhur edhe më parë në historinë e NATO-s.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)