Manipulimi i votave në Malishevë, dhjetëra të ndaluar në operacionin policor

Detaje të reja janë zbuluar nga operacioni më i fundit i policisë së Kosovës në Malishevë, në lidhje me manipulimin e votave në këtë komunë për zgjedhjet parlamentare të 28 dhjetorit.

Gjatë operacionit të drejtuar nga Prokuroria Themelore e Gjakovës janë marrë në pyetje 18 kryesues komisionesh dhe 50 komisionerë, për 15 prej të cilëve është caktuar masa e ndalimit 48 orëshe, lidhur me dyshimet për manipulimin e votave të kandidatëve për deputetë.

Ata dyshohen për veprën penale të falsifikimit të rezultatit të votimeve.

Kryeprokurori Gashi tha se deri më tani nuk po zhvillohen hetime ndaj ndonjë kandidati për deputet.

"Në Malishevë janë 75 vendvotime. 9.057 vota janë të shuar, 7.996 të hequra. Pra, gjithsej në total kemi 17.053 vota", tha Gashi.

Prokuroria e Gjakovës tha se ka pranuar si prova edhe video-incizimet nga Qendrat e Numërimittë cilat do të analizohen më vonë.

Operacioni në Malishevë është i dyti i këtij lloji si pjesë e një hetimi të gjerë për manipulim të votave në zgjedhjet e fundit të parakohshme të Kosovës.

Një operacion i ngjashëm u krye javën e kaluar në Prizren, ku u arrestuan 109 të dyshuar, prej të cilave 23 u dërguan në paraburgim nën dyshimin se kishin manipuluar vota të kandidatëve për deputetë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)