Nis evakuimi i banorëve në Durrës, 20 familje shpërngulen prej përmbytjeve

Situata e rënduar që është krijuar në Durrës prej përmbytjeve, ka sjellë evakuimet e para të personave që janë në zonat më të prekura. Deri më tani bëhet fjalë për 20 familje që janë evakuuar nga banesat e tyre, ku problemet më të mëdha janë në Sukth, Katund të Ri dhe Vadardhë.

Teksa Emergjencat Civile dhe Forcat e Armatosura vijojnë punën në terren, në Prefekturën e Qarkut Durrës u zhvillua mbledhja e Shtabit të Emergjencave Civile, për koordinimin e të gjitha strukturave shtetërore dhe vendore për zbatimin e planit të detajuar për menaxhimin e situates.

E pranishme aty ishte edhe ministrja e Punëve të Brendshme, Albana Koçiu. Së bashku me grupin e punës janë ndarë detyrat për zonat më problematike, të shkaktuara nga reshjet e dendura, ndërsa do të vijojë puna për minimizimin e pasojave dhe garantimin e sigurisë së plotë të jetës dhe pronës së qytetarëve.

“Jeta e qytetarëve është prioritet. Pas stabilizimit të situatës, do të nisë puna për vlerësimin e dëmeve material”, theksoi ministrja Koçiu.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)