Shqipëria nën ujë dhe borë, lumenjtë dalin nga shtrati, dhjetëra fshatra të izoluar

Vijon të jetë serioze situata e krijuara nga moti i keq në vend që ka shkaktuar problematika në disa qarqe të vendit.

Reshjet intensive të shiut kanë sjellë përmbytje masive nga veriu në jug, rritje të niveleve të lumenjve dhe dëme të konsiderueshme në bujqësi, banesa dhe infrastrukturë, ndërsa në zonat malore reshjet e dëborës kanë sjellë izolim dhe bllokim rrugësh.

Situata më kritike paraqitet në jug të vendit, ku lumi Vjosa ka dalë sërish nga shtrati pranë Urës së Mifolit.

Niveli i ujit ka arritur në 7.45 metra dhe pritet të rritet deri në 8.5 apo 9 metra, duke rrezikuar përmbytje të reja dhe zona të banuara përreth.

Në qarkun e Fierit, lumenjtë Shkumbin dhe Seman kanë dalë nga shtrati, duke përmbytur qindra hektarë tokë bujqësore dhe rreth 30 banesa në fshatin Thanasaj, si dhe duke shkaktuar dëme në blegtori.

Probleme të mëdha janë raportuar edhe në zonën e Ishmit, ku rritja e nivelit të lumit ka izoluar dy lagje të fshatit Murqinë, ndërsa qindra hektarë tokë vijojnë të jenë nën ujë.

Në Shkodër, ndonëse situata hidrologjike është më e qëndrueshme, rreth 525 hektarë tokë bujqësore mbeten të përmbytura dhe lëvizja në disa zona realizohet vetëm me mjete të ushtrisë.

Ndërkohë, reshjet e dëborës kanë sjellë vështirësi serioze në veri dhe në zonat malore. Në Malësinë e Krujës, Dibër, Pukë dhe Qafën e Sharrit, trashësia e dëborës ka shkuar deri në 50 centimetra, duke bllokuar akse rrugore si Krujë–Qafështamë dhe Fushë-Arrëz–Iballë, si dhe duke izoluar dhjetëra fshatra.

Rrëshqitjet e dherave dhe gërryerja e tokës në disa zona përbëjnë rrezik për banesa, rrugë dhe linja energjetike.

Autoritetet vijojnë monitorimin dhe ndërhyrjet emergjente, ndërsa situata mbetet dinamike dhe problematike në disa qarqe të vendit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)