Masakra e Reçakut, presidenti Begaj: Thirrja për drejtësi nuk mund të shuhet

Presidenti i Republikës Bajram Begaj ka përkujtuar 27-vjetorin e masakrës së Reçakut në Kosovë. Përmes një postimi në rrjetet sociale ai thotë se kjo masakër nuk mund të harrohet dhe thirrjet për drejtësi nuk mund të shuhen.

“Sot përkujtojmë masakrën e Reçakut dhe nderojmë martirët e saj. Denoncimi i saj 27 vite më parë nga Ambasadori Ëilliam Ëalker ndërgjegjësoi komunitetin ndërkombëtar për gjenocidin që po ndodhte në Kosovë.Ndërgjegjësimi solli Konferencën e Rambujesë, ndërhyrjen e NATO-s, lirinë, shtetin e Kosovës dhe paqen që sot e gëzojmë bashkërisht.  Kjo masakër nuk mund të harrohet!  Thirrja për drejtësi nuk mund të shuhet!  Nderim martirëve! Mirënjohje aleatit tonë strategjik, SHBA-së!”, thuhet në mesazhin përkujtimor të presidentit Begaj.

Masakra e Reçakut ishte masakrimi i 45 shqiptarëve nga Kosova në fshatin Reçak, me 15 janar 1999. Masakra u organizua dhe u krye nga forcat policore, ushtarake dhe paraushtarake serbe. Serbia refuzon ta ketë kryer këtë masakër. Një ditë pas kryerjes së masakrës, William Walker, ambasadori i OSBE-së në Kosovë, vizitoi vendin e ngjarjes u tmerrua nga kufomat e masakruara. Ai deklaroi:"Nga ajo që pashë nuk ngurroj të përshkruaj ndodhinë si masakër dhe krim kundër njerëzimit. Kjo është ngjarja më trishtuese në jetën time."

Lajmi i masakrës senzibilizoi opinionin ndërkombëtar për krimet serbe në Kosovë dhe i hapi rrugën bombardimeve të Natos në Serbi.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)