Nga dronët te anijet luftarake, Vengu: Në prill Shqipëria nis prodhimet ushtarake “Made in Albania”

Ministri i Mbrojtjes, Pirro Vengu, deklaroi gjatë mbledhjes së grupit parlamentar të PS se nga muaji prill Shqipëria do të nisë prodhimet ‘Made in Albania’ dhe viti 2026 do të shënojë rinisjen e industrisë ushtarake në vend, me fabrikat e dronëve dhe uniformave.

Sipas tij, rritja e buxhetit të mbrojtjes nuk synon vetëm forcimin e kapaciteteve ushtarake, por edhe zhvillimin ekonomik dhe teknologjik të vendit.

“Kemi ecur sipas parimit që rritja e buxhetit të mbrojtjes të përkthehet jo vetëm në forcim të kapaciteteve ushtarake dhe të forcës reaguese, por edhe në rritje të mirëqenies ekonomike dhe inovacionit. Fusha ku kjo është më e dukshme është industria ushtarake, me katër kompani të themeluara, ku shteti është aksionar, si dhe me gjashtë kontrata për municione, uniforma, mjete taktike etj...”, u shpreh Vengu.

Ministri bëri të ditur se në muajin prill nis linja e prodhimit të dronëve taktikë, ndërsa janë hapur rekrutimet për 12 inxhinierë që do të trajnohen në bashkëpunim me partnerë izraelitë.

Në muajin maj sipas Vengut do të nisë prodhimi i uniformave për Forcat e Armatosura dhe Policinë e Shtetit, ndërsa po atë muaj do të hapet edhe Shkolla e Aviacionit, për të cilën janë porositur dy helikopterë trajnues.

Programi do të vijojë në qershor me daljen e produkteve të para të mjeteve të emergjencave dhe transportit, në bashkëpunim me kompaninë “Ray Metal”, ndërsa deri në dhjetor pritet të nisë prodhimi i sistemeve antidronë.

Një tjetër zhvillim i rëndësishëm, sipas ministrit, është finalizimi i negociatave me kompaninë italiane Fincantieri për prodhimin e anijeve luftarake në bazën e Pashalimanit.

“Janë finalizuar negociatat me kompaninë ‘Fincantieri’ për prodhimin e anijeve luftarake në bazën e Pashalimanit. Marrëveshja i hap rrugë krijimit të një kompanie të përbashkët për prodhimin e anijeve luftarake”, deklaroi Vengu.

Sa i përket emergjencave civile, ministri njoftoi se është disbursuar fondi për 47 bashki, me rritje të ndjeshme të buxheteve, si trefishim në Lezhë dhe Gramsh. Ai bëri të ditur se 8 milionë euro janë miratuar për infrastrukturën parandaluese, ndërsa 10 milionë euro të tjera janë shpërndarë për projekte të reja si prita dhe ura.

“Së fundmi 10 milionë euro fond i sapo shpërndarë për diga, prita lumore dhe ura për të gjitha bashkitë. Rinovimi i flotës kombëtare të emergjencave, të zjarrëfikësve. Kemi 2 mln euro shtesë ku Agjencia Kombëtare e Mbrojtjes Civile dhe KAYO do të prodhojnë ‘Made in Albania’ dhe në maj do kemi fillimin e këtyre mjeteve, që do të shpërndahen për bashkitë. Fokusi është parandalimi në aspektin e pritave lumore, digave dhe adresimin e dëmve të përmbytjeve të muajve të fundit. Shtylla e tretë, kapitali njerëzor, në 14 muajt e fundit janë shtuar 1 mijë ushtarakë”, tha ministri.

Për rinovimin e flotës së emergjencave janë shtuar 2 milionë euro, ndërsa uniformat dhe mjetet do të prodhohen “Made in Albania”.

Vengu theksoi se shtylla e tretë e reformës është kapitali njerëzor, duke bërë me dije se në 14 muajt e fundit janë rekrutuar 1 000 ushtarakë aktivë, ndërsa numri i largimeve është ulur me 70%.

Po ashtu, programi parashikon ngritjen e dy qendrave rajonale për emergjencat civile dhe blerjen e dy avionëve, duke rikthyer këto kapacitete pas 20 vitesh.

Masat e fundit financiare vijnë pas përmbytjeve dhe dëmtimeve të shumta në infrastrukturë. Një prej akseve më problematike mbetet rruga Librazhd–Prrenjas, e cila vijon të jetë e bllokuar për shkak të dëmtimeve të shkaktuara nga gërryerja e shtratit të lumit Shkumbin dhe ndërhyrjet pranë kantierit të Korridorit VIII.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)