Fitoi 230 mijë dollarë nga shitja e të dhënave në SHBA, 3.8 vite burg për Shpend Sokolin

Gjykata e Posaçme ka dënuar me 3 vite e 8 muaj burg Shpend Sokolin, i shpallur fajtor për mashtrim kompjuterik dhe përfshirje në tregtinë e paligjshme të të dhënave personale.

Sipas vendimit të gjykatës, Sokoli ishte pjesë e platformës kibernetike ilegale “RYDOX”, një treg online ku shiteshin të dhëna sensitive të individëve dhe bizneseve, kryesisht në Shtetet e Bashkuara të Amerikës.

Nga aktiviteti i kësaj platforme rezulton se janë prekur rreth 18 mijë llogari.

Fillimisht, gjykata e dënoi atë me 5 vite e 6 muaj burg, por për shkak të përfitimit nga gjykimi i shkurtuar, masa e dënimit u ul në 3 vite e 8 muaj dhe Sokoli do ta vuajë dënimin në një institucion të sigurisë së lartë.

Në kuadër të vendimit, është urdhëruar edhe sekuestrimi i llogarisë së tij në platformën e kriptomonedhave “Binance”, si dhe kthimi i provave materiale të sekuestruara tek personat që u përkasin.

Nga hetimet ka rezultuar se platforma “RYDOX”, që prej shkurtit të vitit 2016, ka realizuar mbi 7,600 transaksione të shitjes së të dhënave, duke gjeneruar të ardhura prej të paktën 230 mijë dollarësh.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)