Dëmtuan Parkun e Vjosës me gërmime dhe inerte, Prokuroria e Fierit çon në gjyq kompaninë dhe administratorin

Prokuroria e Fierit ka përfunduar hetimet lidhur me dëmtimin e Parkut Natyror të Vjosës, ku dyshohet se është ushtruar aktivitet i paligjshëm për nxjerrjen dhe shfrytëzimin e inerteve. Sipas organit të akuzës, në gjyq janë dërguar administratori i një subjekti privat, si dhe vetë kompania, të cilët akuzohen për shkelje të rënda të legjislacionit mjedisor.

Të pandehur në këtë çështje janë shtetasi B.A., i akuzuar për dëmtim të habitateve natyrore, si dhe shoqëria “P.V. sh.p.k.”. Prokuroria njoftoi se hetimet kanë zbuluar se kompania ka marrë, nxjerrë, përpunuar dhe transportuar inerte përgjatë lumit Vjosa, duke shkaktuar dëmtime të konsiderueshme në habitatin natyror të zonës së mbrojtur, e cila mban statusin “Park Natyror”.

Po ashtu, organi i akuzës theksoi se zona ku është zhvilluar aktiviteti është pjesë e nënzonës qendrore, me nivelin më të lartë të mbrojtjes, ku ndalohet çdo lloj aktiviteti ekonomik. Sipas përfundimeve të hetimit: “Aktiviteti i kompanisë ka sjellë përkeqësim të rëndë të habitatit natyror përmes shfrytëzimit intensiv të tokës dhe përdorimit të mjeteve që kanë shkaktuar ndryshime të thella në biodiversitet, strukturën dhe funksionimin e ekosistemit përgjatë lumit Vjosa”.

NJOFTIMI I PROKURORISË FIER:

“Prokuroria pranë Gjykatës së Shkallës së Parë të Juridiksionit të Përgjithshëm Fier përfundoi hetimet dhe dërgon në gjyq subjektin “P V” sh.p.k., si dhe të administratorit të saj shtetasit B. A. nën akuzë për kryerjen e veprës penale “Dëmtimi i habitateve në zonat e mbrojtura mjedisore”, parashikuar nga neni 202/b i Kodit Penal.

Nga hetimet u provua kryerja e veprimtarisë të paligjshme, e cila konsistonte në marrjen, nxjerrjen, përpunimin dhe transportimin e inerteve përgjatë lumit Vjosë, veprime këto që kishin sjellë si pasojë dëmtimin e habitatit natyror të zonës së mbrojtur mjedisore me status të veçantë “Park Natyror”. Zona ku janë marrë inertet është nënzonë qëndrore, që gëzon shkallën më të lartë të mbrojtjes (zonë atrikte).në të cilën nuk lejohet zhvillimi i asnjë lloj veprimtarie ekonomike.

Prokuroria pranë Gjykatës së Shkallës së Parë të Juridiksionit të Përgjithshëm Fier, provoi se shoqëria “P V” sh.p.k., ka shkaktuar përkeqësim të rëndë të habitatit që ndodhet brenda zonës së mbrojtur mjedisore, duke sjellë si pasojë dëmtim të konsiderueshëm të saj, përmes shfrytëzimit të tokës me teknologji intensive, mjete dhe mënyra që shkaktojnë ndryshime rrënjësore në biodiversitet, në strukturën dhe funksionet e ekosistemeve, si dhe që dëmtojnë në mënyrë të pandreqshme sipërfaqen e tokës përgjatë lumit Vjosë.

Në përfundim të shqyrtimit gjyqësor, gjykata deklaroi fajtor personin juridik, shoqërinë “P V” sh.p.k., si dhe administratorin e saj, shtetasin B. A., për kryerjen e veprës penale “Dëmtimi i habitateve në zonat e mbrojtura mjedisore”, parashikuar nga neni 202/b i Kodit Penal.

Prokuroria Fier mbetet e angazhuar të hetimet me fokus të veçantë në luftën kundër veprave penale mjedisore, duke ndjekur me përparësi çdo rast që cenon mjedisin, biodiversitetin dhe zonat e mbrojtura natyrore”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)