I çoi urën motrës te shtëpia, GJKKO jep vendimin për ish-kryebashkiaken e komanduar të Tropojës

Gjykata e Posaçme kundër Korrupsionit dhe Krimit të Organizuar ka dënuar ish-kryetaren e komanduar të Bashkisë Tropojë, Zyra Islamaj, me 2 vite e 1 muaj burg për akuzën e korrupsionit pasiv.

Megjithatë, gjykata ka vendosur pezullimin e ekzekutimit të dënimit me burg, duke e kaluar atë në shërbim prove për një periudhë 2-vjeçare. Sipas vendimit, Islamaj nuk duhet të kryejë asnjë vepër tjetër penale gjatë kësaj kohe.

Po ashtu, GJKKO ka vendosur që ajo të mos ushtrojë funksione publike për 5 vite.

Në të njëjtën çështje është dënuar edhe ndërtuesi Rrok Gega, i cili mori një dënim me 6 muaj burg. Edhe për të, gjykata ka vendosur pezullimin e dënimit dhe konvertimin e tij në 1 vit shërbim prove.

Sipas hetimeve të SPAK, çështja lidhet me një tender publik, ku Zyra Islamaj dyshohet se i kishte kërkuar ndërtuesit realizimin e një ure pranë banesës së motrës së saj, edhe pse kjo ndërhyrje nuk ishte e parashikuar në projektin fillestar.

Prokuroria pretendon se ish-zyrtarja ka ndërhyrë personalisht tek ndërtuesi dhe ka angazhuar edhe teknikun e mirëmbajtjes së rrugëve në bashki për realizimin e punimeve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)