Dëmshpërblimi për përmbytjet, Edi Rama: Ministria e Financave e ka gati planin

Kryeministri Edi Rama ia rezervoi situatës së krijuar nga moti i keq në vend, një pjesë të fjalës së tij, në podcastin e çdo të diele.

Kreu i qeverisë u shpreh se një situatë e ngjashme nga reshjet e shiut dhe borës është krijuar ditët e fundit në të gjithë Evropën Juglindore.

Ai shtoi se Shqipëria është më e përgatitur për përballimin e këtyre fatkeqësive falë investimeve të qeverisë.

“Kjo javë ka qenë e ngarkuar me reshje e borë. Një gjendje e rëndë që nuk ka prekur vetëm Shqipërinë, por një hartë të tërë në Evropën Juglindore. Prandaj lumenjtë rriten para se të bien, prandaj toka mbushet me ujë. Jam krenar që në çdo situatë ne jemi më të gatshëm, më të përgatitur, falë investimeve që kemi bërë. Emergjencat kanë skuadra të stërvitura dhe më shumë mjekë. Jetojmë në një Shqipëri tjetër. Kjo vorbull në një Shqipëri tjetër do kishte përmbytur 3 herë më shumë. Në 4 ditë ranë reshje sa për 30 ditë. Prurjet e plastikës në lumenj janë kriminale”, tha Rama.

Më tej, kryeministri deklaroi se tashmë ka nisur procesi i verifikimit të dëmeve në terren dhe se Ministria e Financave ka gati një plan për dëmshpërblimet.

“Ti nuk do të jesh kurrë vetëm. Kjo është motoja jonë. Iu them të dëmtuarve nga kjo fatkeqësi se do t’i qëndrojmë çdo detyrimi për banesat dhe gjënë e gjallë. Do vijojmë me riparimet e dëmeve. Ministria e ka përgatitur planin me skenarët e dëmshpërblimit. Presim rezultatet e verifikimeve për të vijuar”, deklaroi Edi Rama.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)