Armët klasike dhe teknologjitë e reja, nismë e re ligjore për kontrollin e mallrave ushtarake

Komisioni për Çështjet e Brendshme dhe të Mbrojtjes diskutoi mbi projektligjin që parashikon ndryshime në kuadrin ligjor për kontrollin shtetëror të transferimeve ndërkombëtare të mallrave ushtarake dhe teknologjive me përdorim të dyfishtë.

Gjatë fjalës së tij, ministri i Mbrojtjes Pirro Vengu vuri theksin te nevoja për një forcim të zinxhirit të kontrollit, duke theksuar se kërcënimet moderne të sigurisë nuk burojnë vetëm nga armët tradicionale, por edhe nga teknologjitë digjitale. Mes tyre janë edhe pajisjet civile, që mund të përdoren për survejim dhe programet kompjuterike që transferohen me shpejtësi përmes kanaleve elektronike.

Sipas ministrit, nisma ligjore synon përafrimin me legjislacionin e Bashkimit Evropian, rritjen e efektivitetit të mekanizmave mbikëqyrës dhe garantimin e sigurisë juridike për operatorët ekonomikë që operojnë në këtë sektor. “Ky projektligj jo vetëm që garanton harmonizimin e plotë me kornizën ligjore të Bashkimit Europian, por përfaqëson edhe një hap të rëndësishëm konkret drejt mbylljes së Kapitullit 30 të negociatave të anëtarësimit”, u shpreh ministri Vengu.

Mes risive që sjell projektligji janë përfshirja e teknologjive kibernetike, transmetimeve elektronike dhe aksesit në distancë në skemën e licencimit. Po ashtu, parashikohet integrimi i kritereve që lidhen me respektimin e të drejtave të njeriut, duke marrë në konsideratë rrezikun e përdorimit të teknologjive për survejim të paligjshëm. Një tjetër element i rëndësishëm është forcimi i mekanizmit “catch all”, i cili i jep autoriteteve kompetente më shumë hapësirë për të ndërhyrë me kontrolle shtesë në rastet kur produktet apo teknologjitë paraqesin rrezik për sigurinë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)