Ish-deputeti socialist kritikon vendimin e mazhorancës për Ballukun: Hap pas në sundimin e ligjit

Ish deputeti socialist Petro Koçi ka kritikuar vendimin e mazhorancës në Parlament për të mos pranuar kërkesën e Strukturës së Posaçme Antikorrupsion për arrestimin e ish zv.kryeministres Belinda Balluku.

Përmes një postimi në rrjetet sociale, Koçi e cilësoi këtë vendim si një hap pas në sundimin e ligjit në Shqipëri.

“Nuk është fundi i botës dhe as kohë e dielltë për opozitën berishiane, por vendimi i sotëm i refuzimit të kërkesës së SPAK për lejen e Kuvendit për masë sigurimi ndaj një deputeteje nën ndjekje penale përben një hap prapa për procesin politik dhe sundimin e ligjit në Shqipëri’, shprehet ai.

Më tej, Koçi shpreh shqetësimin për shtimin e vendimeve me arrest nga drejtësia, por shton se trajtimi i këtij problemi nuk mund të bëhet përmes një rasti individual.

“Unë e vlerësoj shqetësimin e përhapur lidhur me zgjerimin e aplikimit të vendimeve me arrest paraprak si masë sigurimi ndaj disa figurave politike nën ndjekje penale, por trajtimi i këtij shqetësimi nuk mund të administrohet nëpërmjet një rasti individual, por vetëm nëpërmjet ndërhyrjeve të konsultuara me praktikat ndërkombëtare në legjislacion apo nëpërmjet vendimeve normuese të shkallëve të larta të gjyqësorit, edhe këto të konsultuara paraprakisht me Komisionin e Venecias.

Ndërhyrja selektive e politikës së ditës në mbrojtje të individëve të caktuar të saj ndaj ndjekjes penale, opozita në rastin Berisha apo maxhoranca në rastin Balluku, e kompromenton angazhimin publik dhe parimor të klasës politike për të respektuar drejtësinë e re në luftën ndaj korrupsionit dhe krimit të organizuar”, përfundon ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)