Shtrenjtimi i çmimit të karburanteve, një udhëzues praktik për të shpenzuar më pak me makinë

Çmimi i naftës ka kaluar pragun e 100 dollarëve për fuçi në bursën e New York-ut, duke u shtrenjtuar me mbi 13 për qind. Si pasojë, kostoja e karburantit është rritur ndjeshëm dhe është kthyer në një nga shqetësimet kryesore për drejtuesit e automjeteve. Ekspertët paralajmërojnë se konflikti në Iran mund të sjellë rritje të mëtejshme të çmimeve, duke ndikuar jo vetëm te karburanti, por edhe te faturat dhe produktet e konsumit.

Zgjedhja e pikës së karburantit

Edhe diferencat e vogla në çmim mund të kenë ndikim në buxhetin familjar. Midis pikave të karburantit që ndodhen vetëm pak kilometra larg njëra-tjetrës mund të ketë ndryshime prej disa lekësh për litër. Për shembull, në një furnizim prej 50 litrave, një diferencë prej 10 lekësh të reja për litër mund të kursejë rreth 500 lekë të reja. Nëse makinën e mbush me karburant dy herë në muaj, gjatë vitit kursimi përkthehet në afro 12 mijë lekë të reja.

Stili i drejtimit dhe kursimi i karburantit

Ka disa teknika që rrisin efikasitetin në drejtimin e mjetit: shoferët mund të rrisin distancën që përshkojnë me çdo litër karburant. Ajo përfshin një stil drejtimi më të qetë, shmangien e përshpejtimeve të forta dhe përdorimin e inercisë së makinës. Mbajtja e një shpejtësie të qëndrueshme dhe parashikimi i trafikut ndihmojnë në uljen e konsumit.

Roli i teknologjisë dhe planifikimit

Aplikacionet si Google Maps ose Waze, që mbledhin informacion në kohë reale rreth trafikut, mund të ndihmojnë në kursimin e karburantit duke sugjeruar rrugë alternative. Qëndrimi i gjatë në trafik me ndalesa të shpeshta, rrit konsumin e karburantit. Nëse në Europë qytetarët këshillohen ti furnizojnë makinat jashtë autostradave, sepse aty çmimet janë më të larta, në Shqipëri ndodh e kundërta. Sa më tepër të largohesh nga qendrat e banuara, çmimet janë zakonisht më të lira.

Automjetet hibride dhe koha e furnizimit

Automjetet hibride janë më efikase sidomos në qytet, ku motori elektrik përdoret më shpesh. Ndërsa modelet me karikim mund të përshkojnë disa kilometra vetëm me energji elektrike, por vetëm nëse bateria rimbushet rregullisht. Sa i përket kohës së furnizimit, çmimet shpesh rriten gjatë fundjavës, ndërsa mesjava, veçanërisht e marta ose e mërkura, konsiderohet zakonisht periudha më e favorshme për të bërë furnizimin me karburant.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)