Koncert shqiptaro-amerikan në Tiranë, VanHorn: Jemi aleatë dhe miq të ngushtë

Në Tiranë u zhvillua një koncert i përbashkët mes Orkestrës së Forcave të Armatosura të Shqipërisë dhe grupit muzikor “Flagship” të Forcave Detare të SHBA-së për Europën dhe Afrikën. Eventi u organizua në kuadër të Javës Amerikane të Kulturës.

Mbrëmja mblodhi përfaqësues të institucioneve, diplomatë, ushtarakë dhe qytetarë, duke u kthyer në një event simbolik të bashkëpunimit kulturor dhe marrëdhënieve mes dy vendeve. E Ngarkuara me Punë e SHBA-së në Tiranë, Nancy VanHorn vlerësoi bashkëpunimin artistik si një pasqyrim të partneritetit mes dy shteteve.

“Sonte sjellim në skenë grupin ‘Flagship’ së bashku me Orkestrën e Forcave të Armatosura Shqiptare. Dy formacione ushtarake të nivelit të lartë, të bashkuara në një performancë të vetme”, tha ajo gjatë fjalës së saj. VanHorn e lidhi aktivitetin edhe me nismën “Freedom 250”, që shënon 250-vjetorin e pavarësisë së SHBA-së, duke e cilësuar atë si një ftesë për vendet partnere që të ndajnë vlerat e lirisë dhe bashkëpunimit.

Foto: Ambasada e SHBA

“Është një mundësi për të reflektuar mbi historinë dhe vlerat që ndajmë, përfshirë lirinë dhe mundësitë për zhvillim”, u shpreh ajo. Sipas diplomates amerikane, marrëdhënia mes Shqipërisë dhe Shteteve të Bashkuara nuk kufizohet vetëm në diplomaci, por shtrihet edhe në kulturë, mbrojtje dhe bashkëpunim afatgjatë.

“Kjo nuk është thjesht një mbrëmje muzikore. Është një dëshmi e partneritetit tonë si aleatë dhe miq të ngushtë”, theksoi VanHorn. Koncerti u organizua në bashkëpunim me institucione shqiptare, duke përfshirë Ministrinë e Kulturës dhe Ministrinë e Mbrojtjes, dhe u shoqërua me performanca të përbashkëta muzikore që sollën një atmosferë festive në kryeqytet.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)