Takoi “sheikun” e rremë për intervistë pune, legjenda e futbollit anglez u rrëmbye dhe u mbajt peng

Një legjendë e futbollit anglez ka rrëfyer se ishte “me fat që doli gjallë” pasi u rrëmbye dhe u mbajt nën kërcënimin e thikës gjatë asaj që besonte se ishte një intervistë pune për një post të rëndësishëm trajneri. Bëhet fjalë për Adrian Heath, ish-ikonën e Everton-it dhe ish-trajner në kampionatin amerikan.

Duke folur për “The Athletic”, 65-vjeçari tregoi se kishte rënë në një kurth të përgatitur me kujdes. Përpara udhëtimit në Marok ai kishte kërkuar edhe këshilla nga njerëz të besuar, duke përfshirë edhe Steven Gerrard, i cili kishte punuar më parë në Arabinë Saudite. Oferta dukej shumë fitimprurëse, e për këtë arsye në muajin nëntor udhëtoi drejt vendit afrikan.

Në Marok ishte ftuar që të takonte një person, i cili i ishte prezantuar si “sheik”. Atë ia kishin përshkruar si pronar të madh hotelesh dhe biznesesh në rajon. Por sapo Heath mbërriti, situata mori një kthesë dramatike. Dy burra e pritën me lule dhe e shoqëruan me makinë drejt një qyteti-port të vogël.

Pasi hyri në një dhomë, në të cilën ndodheshin edhe tre persona të tjerë, iu bë e qartë se ishte rrëmbyer. “Duhet ta kuptosh që kjo nuk është ajo që mendoje”, i tha njëri prej burrave. Më pas kërcënimet u bënë të drejtpërdrejta: rrëmbyesit i kërkuan një shumë parash me gjashtë shifra, duke e kërcënuar se nëse nuk paguante, nuk do ti shihte më kurrë gruan, fëmijët dhe nipërit.

Foto nga web

Situata u përshkallëzua gjatë natës, kur një thikë iu vendos në fyt. Heath tregoi se në ato momente mendonte vetëm për familjen e tij. Rrëmbyesit telefonuan bashkëshorten e tij, Jane, duke i kërkuar të transferonte para. Ndërkohë, djali i tij ish-futbollist, Harrison Heath, arriti ta lokalizonte të atin përmes aplikacionit “Find My Friends”. Me këto të dhëna, familja kontaktoi autoritetet amerikane dhe FBI-ja u përfshi menjëherë në çështje.

Nën presionin e hetimeve, Heath u tha rrëmbyesve se e vetmja mënyrë për të marrë para ishte ta linin të kthehej në SHBA. Papritur, një nga rrëmbyesit hyri në dhomë dhe i tha të merrte sendet: po dërgohej në aeroport. Kundër çdo pritshmërie, ai u lirua. Fillimisht, legjenda e futbollit anglez nuk kishte ndërmend ta bënte publik historinë, por ndryshoi mendje pasi FBI e informoi se një tjetër trajner kishte rënë viktimë e një skeme të ngjashme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)