Europa League/ Bologna sërish kundër Brann në “play-off”, në 1/8-at e presin Roma ose Freiburg

Bologna buzëqesh pas shortit të fazës “play-off” në Europa League, i cili ka qenë mjaft pozitiv. Skuadra e drejtuar nga Vincenzo Italiano do të përballet me norvegjezët e Brann, kundërshtarë që i ka hasur edhe më herët në fazën e grupeve. Ajo ndeshje e luajtur më 6 nëntor 2025 në Emilia-Romagna përfundoi pa gola.

Ndeshja e parë kundër Brann do të zhvillohet më 19 shkurt në Bergen të Norvegjisë, ndërsa takimi i kthimit më 26 shkurt në stadiumin “Dall’Ara”. Në këtë mënyrë, Bologna shmangu përballjen me një kundërshtar të frikshëm si Dinamo Zagreb. Skuadra ku aktivizohet ylli kuqezi, Arbër Hoxha do të luajë ndaj belgëve të Genk.

Në rast kualifikimi, kuqeblutë do të mësojnë kundërshtarin e fazës së 1/8-ave vetëm pas shortit të 27 shkurtit. Në horizont nuk përjashtohet një përballje italiane, pasi Bologna mund të ndeshet me Romën ose me gjermanët e Freiburgut.

Çiftet e “play-off” të Europa League:

-Ludogorets - Ferencvaros

-Dinamo Zagreb - Genk

-Celtic - Stuttgart

-Brann - Bologna

-Panathinaikos - Viktoria Plzen

-PAOK - Celta Vigo

-Fenerbahçe - Nottingham Forest

-Lille - Crvena Zvezda

Komente (0)