Bileta deri në 950 euro, UEFA publikon çmimet e finales së Champions

UEFA ka hapur shitjen e biletave për finalet e majit të kompeticioneve europiane, duke përfshirë Champions League, Europa League dhe Conference League. Shumica e biletave janë rezervuar për tifozët e skuadrave finaliste dhe për publikun neutral. Procesi i shitjes për tifozët e skuadrave finaliste do të koordinohet direkt me klubet përkatëse, ndërsa biletat për publikun neutral do të shpërndahen përmes një shorti në fund të periudhës së aplikimit në UEFA.com/tickets.

Pjesa tjetër e biletave do të shkojë për organizatorët lokalë, federatat kombëtare, partnerët komercialë dhe median sportive. Çmimet ndryshojnë sipas kategorive: 'Fans First' për tifozët e finalisteve, dhe kategoritë 3, 2 dhe 1, ku 3 është më e lirë dhe 1 më e shtrenjtë.

Për finalen e Champions League më 30 maj 2026 në Budapest çmimet janë: “Fans First”, për tifozët e ekipeve finaliste 70 euro, Kategoria 3 çmimi 180 euro, Kategoria çmimi 650 euro dhe Kategoria 1 çmimi është plot 950 euro. Nga 61,400 biletat në dispozicion, sipas kapacitetit që ka stadiumi në kryeqytetin hungarez, UEFA ka përcaktuar që 39 mijë janë për tifozët dhe publikun neutral, me maksimum 17,200 bileta për secilën skuadër finaliste.

Për finalen e Europa League më 20 maj në Stamboll, 27,500 nga 37,500 biletat në dispozicion janë për tifozët e dy finalisteve dhe publikun neutral, me çmime nga 40 euro, për të vijuar deri në 240 euro për Kategorinë 1. Për finalen e Conference League, 39,700 biletat në stadiumin e Lajpcigut në Gjermani do të shiten nga 25 euro deri në 190 euro.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)