Tension në fushë e tribuna dhe kartonë të kuq, Elbasani dhe Egnatia ndajnë pikët

Barazim pa gola në duelin direkt ndërmjet Elbasanit dhe Egnatias, dy skuadra që praktikisht e kanë “hipotekuar” vendin në “Final Four” dhe janë pretendente për titullin kampion. Ndeshja përfundoi me rezultatin 0-0, për një 90-minutësh ku rastet e shumta të krijuara nga të dyja skuadrat, u ndërthurën me tensionin në fushë dhe në tribuna.

Nga Elbasani u largua me karton të kuq Boye që prej fillimit të sfidës, për një gjest anti-sportiv. Më pas, kur kronometri nuk kishte shënuar ende gjysmë ore lojë, Ruçi la kampionët në fuqi me 10 lojtarë. Ai episode bëri që të dyja ekipet të luanin deri në fund me nga dhjetë futbollistë në fushë.

Në minutën e 32-të, një përplasje mes Lajthisë dhe Alijev solli edhe reagimin e tifozëve verdheblu. Një kapsollë u hodh pranë arbitrit të FIFA-s, Rejdi Avdo. Anësori mbeti i dëmtuar dhe loja u ndërpre për disa çaste. Pas atij episodi, ndeshja rifilloi normalisht.

Duke shfrytëzuar hapësirat në fushë, Elbasani dhe Egnatia prodhuan raste të shumta për shënim. Verdheblutë mund të kishin shënuar edhe në fund me Lajthinë, por ishin të pafatë. Supersfida e javës së 29-të e mban Ebasanin në krye të renditjes me 53 pikë, ndërsa Egnatia mbetet në vendin e tretë me 2 pikë më pak. Nga barazimi ndërmjet tyre mund të përfitojë Vllaznia, që me një fitore ndaj Dinamos mund të ngjitet në vendin e parë, në kuotën e 55 pikëve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)