Humb një ski në ajër dhe realizon kërcimin, “fluturimi” i pamundur i Matej Svancer

Edicioni 2026 në “Laax Open”, një prej etapave të Kupës së Botës në Ski të Lirë, ka regjistruar një moment fantastik dhe jashtë çdo parashikimi. Protagonist ishte austriaku Matej Svancer, i cili realizoi një nga manovrat më të pabesueshme të sezonit. Ai e përfundoi kërcimin edhe pse humbi një ski në ajër.

Gjatë garës që kombinon kërcime, akrobaci dhe lëvizje spektakolare, Svancer humbi skinë e djathtë menjëherë pas shkëputjes nga rampa, gjatë konkurrimit në zbritjen e dytë. Pavarësisht incidentit, rrotullimi në ajër kishte nisur dhe sportisti vendosi ta çonte deri në fund manovrën.

Zgjedhja e tij për të mos e ndërprerë garën, rezultoi fantastike. Austriaku arriti të kryejë tre rrotullime të plota dhe realizoi një ulje të pastër, duke ruajtur ekuilibrin dhe kontrollin mbi një ski. Situata ekstremisht e rrezikshme elektrizoi publikun dhe la pa fjalë edhe gjyqtarët.

Manovra e Svancer u cilësua si një akt guximi dhe gjakftohtësie të jashtëzakonshme, duke konfirmuar talentin e tij mes emrave më të fortë të skive të lira botërore. Në përfundim të garës, ai u rendit në vendin e dytë, ndërsa fitorja shkoi për norvegjezin Birk Ruud, i cili u konfirmua edhe një herë si një nga dominuesit e Kupës së Botës në këtë disiplinë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)