Protesta e PD para Kuvendit, Ambasada e SHBA thirrje qytetarëve amerikanë: Shmangni zonën!

Ambasada e Shteteve të Bashkuara në Tiranë ka paralajmëruar qytetarët amerikanë për protestën e planifikuar të enjten, më 12 mars 2026, përpara Kuvendit të Shqipërisë, duke i këshilluar të shmangin zonën dhe të ndjekin udhëzimet e autoriteteve lokale.

Në njoftimin e saj, ambasada thekson se demonstrata pritet të zhvillohet në orën 10:00 të mëngjesit, kur protestuesit planifikojnë të mblidhen pranë ndërtesës së parlamentit në Rrugën George W. Bush. Sipas paralajmërimit, protesta mund të zgjerohet edhe në zonat përreth dhe pranë ndërtesave qeveritare.

Autoritetet amerikane paralajmërojnë për prani të shtuar policie, bllokime rrugësh dhe ndërprerje të trafikut në orët para dhe gjatë protestës. Personeli i ambasadës është këshilluar gjithashtu të shmangë demonstratën dhe të monitorojë mediat lokale për informacionet më të fundit.

“Edhe pse protestat dhe tubimet e mëdha shpesh fillojnë në mënyrë paqësore, situata mund të ndryshojë shpejt. Protesta mund të zgjerohet në rrugët dhe ndërtesat qeveritare përreth, duke shkaktuar ndërprerje të trafikut, devijime dhe bllokime rrugësh”, thuhet në njoftim.

Ambasada këshillon qytetarët amerikanë që të shmangin zonën e protestës, të jenë të vetëdijshëm për rrethinën, të kufizojnë shpërqendrimet si telefonat ose kufjet në publik, të monitorojnë mediat lokale dhe të kenë gjithmonë një plan emergjence ose strategji daljeje.

Protesta është paralajmëruar nga Partia Demokratike, e cila ka bërë thirrje për tubim para parlamentit në ditën kur pritet të diskutohet kërkesa e SPAK për heqjen e imunitetit të deputetes dhe ish-zëvendëskryeministres Belinda Balluku, e cila po hetohet për akuzën e shkeljes së barazisë në tendera.

Ndërkohë, kryetari i opozitës Sali Berisha ka akuzuar kryeministrin Edi Rama se po mbron Ballukun dhe se po dëmton procesin e integrimit evropian të vendit.

“Tani del një Haxhi Qamil. Një apatrid që vetëm pak muaj më parë bërtiste për pasaportën evropiane që do t’u dhuronte shqiptarëve dhe tani u nxjerr pasaportën e Beogradit shqiptarëve në vend të saj. Ky është një akt që vetëdijshëm e shkëput Shqipërinë nga aleatët natyralë”, deklaroi Berisha.

Ai u bëri thirrje qytetarëve që t’i bashkohen protestës, duke e cilësuar situatën në vend si të rëndë.

“Edi Rama, pasi ka vjedhur miliarda me organizatën e tij kriminale, tani zhduk edhe Kushtetutën, zhduk shtetin ligjor dhe shkatërron drejtësinë për të mbrojtur lëkurën e tij. Nuk ka ditë më të vështirë për vendin se sa kjo”, u shpreh lideri i opozitës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)