Irani godet Dubain me raketa dhe dronë, shpërthime pranë Palm Jumeirah dhe Burj Khalifa-s

Tensionet në Lindjen e Mesme janë përshkallëzuar ndjeshëm pasi Irani ka ndërmarrë një seri sulmesh me raketa dhe dronë ndaj Emirateve të Bashkuara Arabe dhe shteteve të tjera në rajon që mbështesin amerikanët.

Shpërthime të fuqishme janë raportuar sipas BBC pranë zonave turistike dhe hoteleve luksoze në Dubai, ndërsa autoritetet në Emiratet e Bashkuara Arabe thonë se një pjesë e sulmeve është neutralizuar.

Një raketë ka rënë në zonën prestigjioze të Palm Jumeirah, një ishull artificial i njohur për resortet dhe hotelet luksoze. Sipas dëshmive dhe pamjeve të publikuara në rrjetet sociale, një zjarr i madh ka shpërthyer pranë hyrjes së hotelit Fairmont The Palm, pasi mbetje të dyshuara nga raketat ranë në zonë.

Fotografitë e siguruara nga dëshmitarë okularë tregojnë re të dendura tymi që ngrihen mbi zonën turistike, shumë pranë qendrës së Dubait dhe jo larg nga Burj Khalifa, ndërtesa më e lartë në botë.

Ndërkohë, Ministria e Mbrojtjes e Emirateve të Bashkuara Arabe njoftoi se sistemet e mbrojtjes ajrore kanë interceptuar një valë të re raketash dhe dronësh iranianë. Sipas autoriteteve, situata është nën kontroll dhe prioritet mbetet siguria e qytetarëve dhe turistëve.

Ndërkohë, mediat shtetërore iraniane kanë raportuar se sulmet janë pjesë e një operacioni ushtarak, pa dhënë detaje të qarta mbi objektivat specifike. Në Emiratet e Bashkuara Arabe ndodhet gjithashtu një prani ushtarake amerikane, çka rrit ndjeshëm ndjeshmërinë e situatës.

Përveç Dubait, një sulm me dron është raportuar edhe në aeroportin ndërkombëtar të Kuvajtit. Sipas Drejtorisë së Përgjithshme të Aviacionit Civil të Kuvajtit, disa punonjës pësuan lëndime të lehta, ndërsa Terminali 1 ka pësuar dëme materiale.

Autoritetet kuvajtiane deklaruan se situata është nën kontroll dhe operacionet po menaxhohen nga strukturat përkatëse të sigurisë.

Sulmet e fundit rrisin frikën për një përshkallëzim të gjerë të konfliktit në rajon, duke përfshirë objektiva civile, turistike dhe infrastruktura kritike. Komuniteti ndërkombëtar po ndjek me shqetësim zhvillimet, ndërsa priten reagime të mëtejshme diplomatike dhe ushtarake.

Komente (0)