Shpërthim për Krishtlindje në Selanik, sulmohet dega e një banke

Krishtlindjet në Selanik të Greqisë u tronditën nga një shpërthim i fuqishëm në të gdhirë të 25 dhjetorit, i cili shkaktoi dëme të shumta materiale dhe alarm tek banorët e zonës.

Ngjarja ndodhi rreth orës 03:20 në mëngjes, jashtë një dege banke në kryqëzimin e rrugëve Karaoli dhe Dimitriou, ku një pajisje shpërthyese ishte vendosur pranë objektit.

Shpërthimi ishte aq i fortë saqë theu të gjitha xhamat e bankës, por dëme pati dhe brenda saj. Përveç kësaj, janë shkaktuar dëme të konsiderueshme edhe te automjetet e parkuara përreth dhe hyrjet e pallateve të banimit.

Sipas informacionit të deritanishëm nga policia greke, nuk është bërë asnjë thirrje paralajmëruese para shpërthimit, që do të kishte mundur të sinjalizonte forcat e sigurisë. Fakti që eksplozivi ishte vendosur larg bankomateve sugjeron se qëllimi nuk ishte vetëm grabitja e tyre, por po hetohen edhe motive të tjera.

Në vendngjarje kanë mbërritur forcat e Departamentit të Asgjësimit të Municioneve Shpërthyese dhe njësi të tjera hetimore të Policisë Greke, të cilët po shqyrtojnë materialet e sigurisë dhe po mbledhin dëshmi për të sqaruar rrethanat e ngjarjes. Hetimet janë në vazhdim e sipër, ndërsa autoritetet po analizojnë edhe shkaqet dhe autorët e mundshëm të shpërthimit.

Ende nuk janë raportuar të lënduar apo viktima, por dëmet materiale dhe tronditja e banorëve kanë ngritur shqetësime për sigurinë në një nga zonat më të populluara të Selanikut, veçanërisht në një ditë festash si Krishtlindjet.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)