Ballkani ka ndotjen më të lart të ajrit në Europë, ndonjëherë mbi nivelet e Pekinit

Kur flitet për qytetet më të ndotura në botë, menjëherë të shkon mendja te Neë Delhi apo Pekini. Megjithatë, të dhënat e reja kanë treguar probleme akute të ndotjes në zemër të Europës. Sipas një studimi të ri nga Instituti Paul Scherrer në Zvicër, ndotja e grimcave në Ballkan është më e larta në Europë.

Situata është tejet alarmante, pasi në disa raste ndotja në Gadishullin ku jetojmë ndonjëherë tejkalon edhe nivelet e Pekinit, duke qenë ndër më të lartat në botë. Studimi është publikuar nga britanikja “The Guardian”. Sipas Andre Prevot, në dimër ndotja e grimcave është alarmante, ndërsa niveli i dioksidit të squfurit mund të jetë mbi 30 herë më i lartë se në pjesën e Europës perëndimore.

Sipas raportit, në Bosnjë-Hercegovinë çdo vit regjistrohen afro 3,300 vdekje për shkak të ndotjes së ajrit. Për të realizuar studimin u përdor një furgon i pajisur me sensorë të avancuar për matjen e ndotjes në rrugët e Sarajevës gjatë dimrit. Rezultatet treguan se grimcat tejkalojnë udhëzimet ditore të Organizatës Botërore të Shëndetësisë në 66 për qind të kohës.

Alarmi kryesor lidhet me faktin se zonat më të ndotura janë ato rezidenciale. Përdorimi i drurit, qymyrit dhe djegia e mbeturinave për ngrohje shtëpiake dominonin, së bashku me lëndët kancerogjene si hidrokarburet aromatike. Probleme të tjera janë flota e vjetër e makina që përdorin qytetarët, me moshë mesatare 19 vjet, por edhe gatimet e restoranteve në qytet.

Sipas hartës së publikuar, edhe niveli i ajrit në Shqipëri është në nivele alarmante, ku normat më të larta regjistrohen kryesisht në veri-lindje të vendit. Po aq keq janë edhe vende si Polonia, Serbia dhe Maqedonia e Veriut, teksa nuk ka të dhëna për Kosovën.

Foto ilustruese

Ekspertët theksojnë nevojën për izolim të shtëpive, sisteme qendrore ngrohjeje dhe inspektime të sobave të drurit. Për të përmirësuar cilësinë e ajrit këshillohet ulja e përdorimit të djegies së lëndëve të forta në masën 90% deri në vitin 2033.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)