4 qytete kroate ndalojnë alkoolin nga ora 9 e mbrëmjes deri në 6 të mëngjesit

Një valë masash të reja kundër konsumimit të alkoolit nga të rinjtë pritet të prekë disa qytete në Kroaci, pasi autoritetet lokale po planifikojnë kufizimin e shitjes së alkoolit gjatë orëve të natës.

Pas propozimit të qeverisë kroate për rregulla më të ashpra mbi shitjen e alkoolit dhe pijeve energjike për të miturit, disa bashki kanë nisur të marrin vendime konkrete. Sipas mediave kroate, katër qytete kanë konfirmuar se do të vendosin ndalim të shitjes së alkoolit nga ora 21:00 deri në 06:00 të mëngjesit.

Split është një nga qytetet e para që pritet të zbatojë masën, me synimin për të ulur incidentet dhe konsumimin e tepërt të alkoolit në zonën historike të qytetit. Ndalimi do të vlejë vetëm për kioskat dhe marketet, ndërsa baret dhe restorantet nuk do të preken nga kjo masë.

Lëvizje të ngjashme kanë paralajmëruar edhe Zadar, Makarska dhe Hvar. Autoritetet në Makarska theksojnë se problem mbeten dyqanet dhe suvenirshopet që shesin alkool të lirë në qendër të qytetit.

Ndërkohë, Zagreb dhe Dubrovnik ende nuk kanë marrë një vendim përfundimtar. Kryebashkiaku i Zagrebit, Tomislav Tomašević, deklaroi se çështja do të diskutohet pas hyrjes në fuqi të ligjit të ri.

Nga ana tjetër, qytete si Šibenik, Rovinj dhe Labin janë shprehur kundër kufizimeve, duke argumentuar se ligjet ekzistuese janë të mjaftueshme për të kontrolluar konsumimin e alkoolit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)