“Dekreti i emërimit, i pavlefshëm”, Erion Veliaj padit Presidencën dhe prokurorin Ols Dado

Kryetari në detyrë i Bashkisë së Tiranës, Erion Veliaj padit institucionin e Presidencës dhe prokurorin e posaçëm, Ols Dado. Depozitimi është bërë në Gjykatën Administrative të Shkallës së Parë Tiranë, për periudhën nga viti 2007 deri më 2012 dhe aty kërkohet shpallja e pavlefshmërisë absolute të dekretit të Dados si prokuror në vitin 2008.

Sipas kërkesë-padisë, emërimi është kryer në kundërshtim të hapur me legjislacionin në fuqi në atë kohë. Sipas padisë së Veliajt, Ols Dado nuk përmbushte kriteret ligjore të domosdoshme për ushtrimin e funksionit të prokurorit, duke qenë noter dhe pa kryer Shkollën e Magjistraturës.

“Në momentin e dekretimit, subjekti nuk gëzonte statusin e magjistratit dhe nuk plotësonte kushtet ligjore për t’u emëruar prokuror, çka e bën aktin administrativ absolutisht të pavlefshëm,” thuhet në padi.

Veliaj kërkon gjithashtu që Gjykata të detyrojë Këshillin e Lartë të Prokurorisë të marrë vendim për përfundimin e menjëhershëm të statusit të magjistratit të Ols Dados, si dhe për ndalimin e ushtrimit të mëtejshëm të funksionit të prokurorit në mënyrë të paligjshme.

“Pasojat e këtij akti të paligjshëm kanë cenuar rëndë funksionimin e Bashkisë së Tiranës, rendin kushtetues, institucionet shtetërore, si dhe të drejtat personale e familjare të paditësit,” argumentohet më tej. Sipas padisë, Ols Dado është propozuar për emërim në vitin 2008 nga Prokurorja e Përgjithshme e asaj kohe, Ina Rama. Presidenca e miratoi dekretin, pavarësisht mungesës së kushteve ligjore, duke e emëruar nga noter në prokuror.

Në padi theksohet se të gjitha veprimet procedurale dhe penale të ndërmarra ndaj Erion Veliajt, përfshirë masat e sigurisë dhe kufizimin e ushtrimit të mandatit si Kryetar i Bashkisë së Tiranës, mbështeten mbi një akt emërimi “nul ab initio”.

Foto nga dokumenti

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)