Shkarkimet në hidrocentrale, KESH: I kemi në kontroll që të mos përmbytet nënShkodra

Korporata Elektroenergjitike Shqiptare ka përditësuar situatën e prurjeve në Kaskadën e Drinit, duke theksuar se, megjithëse janë kryer shkarkime të detyruara nga hidrocentralet, situata mbetet nën kontroll dhe nuk paraqet rrezik për përmbytje në zonën e nënShkodrës.

Sipas KESH, nivelet në liqenet e Kaskadës së Drinit janë aktualisht të larta, si pasojë e reshjeve të dendura të shiut në 24 orët e fundit.

“Nivelet në liqenet e Kaskadës së Drinit janë relativisht të larta, si pasojë e reshjeve të shiut dhe e prurjeve shumë të larta hidrike. Këto prurje rezultojnë të jenë në vlerat më të larta të mesatares shumëvjeçare të regjistruar. Kapacitetet rezervuese të liqeneve të Kaskadës së Drinit janë në limitet e tyre dhe për këtë arsye jemi të obliguar të mbajmë në kuota disi të larta në shkarkime, në raport me prurjet e shumta hidrike në kaskadë”, bën të ditur KESH.

Megjithatë, KESH garanton se shkarkimet nuk e tejkalojnë nivelin e prurjeve natyrore dhe pritet që ato të reduktohen në orët në vijim.

“Sidoqoftë, këto shkarkime nuk janë asnjëherë më të larta se prurjet natyrore. Konkretisht është shkarkuar 70–90 për qind e prurjeve ujore në kaskadë, shkarkime këto që në orët në vazhdim do të vijnë duke u reduktuar”, thekson KESH.

Korporata bën të ditur se situata po monitorohet në mënyrë të vazhdueshme, me qëllim minimizimin e rrezikut nga përmbytjet në zonën e nënShkodrës, duke garantuar transparencë të plotë me publikun dhe autoritetet vendore e qendrore.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)