Ishin fshehur në një ndërtesë të braktisur në Korçë, policia ndalon 16 emigrantë

Një tjetër rast i emigracionit të paligjshëm është evidentuar në qarkun e Korçës, ku Policia Kufitare ka ndërhyrë pas informacioneve për persona të dyshuar të fshehur në një zonë rurale. Gjatë operacionit, uniformat blu konstatuan 16 emigrantë të paligjshëm, të moshave dhe kombësive të ndryshme, të cilët ishin strehuar në një ndërtesë të braktisur në fshatin Qatrom.

Sipas burimeve zyrtare, emigrantët ndodheshin pranë teqesë së fshatit dhe po prisnin sinjale për t’u zhvendosur drejt Tiranës. Gjatë kontrollit, një prej tyre u gjet me probleme shëndetësore, pasi kishte dëmtuar këmbën, ndaj në vendngjarje u thirr ambulanca për ndihmë mjekësore.

Policia Kufitare e Korçës ka shtuar kontrollet në zonë, me fokus edhe identifikimin e personave që ndihmojnë emigrantët e paligjshëm. Të ndaluarit janë shoqëruar në Drejtorinë e Kufirit dhe Migracionit për procedurat përkatëse.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)