Mbi 80 kg kokainë nga Ekuadori, dy shqiptarë kapen në flagrancë në Spanjë

Një operacion i përbashkët i Guardia Civil dhe Shërbimit të Mbikëqyrjes Doganore të Agjencisë Tatimore në Spanjë çoi në sekuestrimin e mbi 80 kilogramëve kokainë në  portin e Vigos, duke goditur një tjetër tentativë të rrjeteve ndërkombëtare të narkotrafikut për të hyrë në Evropë.

Droga ishte e fshehur në një kontejner të ardhur nga Ekuadori dhe u zbulua pas një kontrolli të detajuar radiologjik.

Hetimi nisi kur Njësia e Analizës së Riskut në Doganën e Vigos përzgjodhi për kontroll një kontejner të dyshimtë. Gjatë skanimit me rreze X u konstatuan parregullsi në sistemin e ftohjes, ku u gjetën fillimisht 61 pako kokainë.

Pas zbulimit, autoritetet organizuan një operacion të fshehtë për të identifikuar personat që do të merrnin ngarkesën.

Dy shtetas shqiptarë u arrestuan në orët e para të mëngjesit të 15 shkurtit, teksa tentonin të hynin në zonën portuale për të tërhequr drogën. Në vendngjarje u sekuestruan çanta sportive, një shkallë e palosshme, trapan, lidhëse plastike dhe telefona celularë.

Një kontroll i dytë zbuloi edhe nëntë pako të tjera të fshehura në mekanizmin e ftohjes, duke e çuar sasinë totale mbi 80 kilogramë.

Hetimet, të drejtuara nga Gjykata e Instruksionit nr. 2 në Vigo, vijojnë për të zbuluar lidhjet ndërkombëtare të rrjetit kriminal.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)