Me 60 kilogramë marijuanë në makinë, kapet 18-vjeçari pranë kufirit Greqi-Shqipëri

Një tjetër goditje ndaj trafikut të drogës është shënuar pranë kufirit mes Greqisë dhe Shqipërisë, ku policia greke ka sekuestruar mbi 60 kilogramë marijuanë dhe ka arrestuar një 18-vjeçar.

Operacioni u zhvillua nga oficerët e Departamentit të Narkotikëve të Nëndrejtorisë së Ndjekjes dhe Hetimit të Krimeve në Igoumenitsa, të cilët ndaluan një automjet në zonën e Sagiada, shumë pranë kufirit greko-shqiptar.

Sipas autoriteteve, makina, e marrë me qira nga një kompani, drejtohej nga një shtetas grek 18-vjeçar. Gjatë kontrollit të mjetit, policia gjeti në bagazh dhe në sediljet e pasme tre çanta që përmbanin gjithsej 55 pako me marijuanë, me peshë totale 60 kilogramë e 565 gramë. Lënda narkotike u sekuestrua, ndërsa ndaj të riut u ngrit një dosje penale për trafikim dhe transportim droge.

Autoritetet greke bëjnë me dije se vetëm që nga muaji shtator janë sekuestruar rreth 835 kilogramë marijuanë që dyshohet se vinte nga Shqipëria.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)