Guardiola largohet nga Manchester City, Enzo Maresca trajneri i ri

Një epokë historike duket se po mbyllet te Manchester City. Sipas raportimeve të fundit nga mediat britanike, Pep Guardiola do të largohet nga klubi në fund të sezonit, ndërsa pasuesi i tij do të jetë italiani Enzo Maresca.

Mësohet se Maresca ka firmosur një kontratë trevjeçare për të marrë drejtimin e kampionëve të Premier League. Lajmi është konfirmuar edhe nga gazetari i njohur Fabrizio Romano.

Italiani 46-vjeçar nuk është një emër i panjohur për Cityn, pasi ka qenë më herët ndihmës i Guardiolës gjatë viteve 2022-2023 dhe ka trajnuar gjithashtu ekipet e moshave të klubit anglez. Pas largimit nga Manchesteri, ai arriti të ngjisë Leicester City në elitën angleze dhe më pas drejtoi Chelsea, ku fitoi UEFA Conference League dhe Kupën e Botës për Klube.

Guardiola pritet të largohet pas një periudhe të jashtëzakonshme suksesi në “Etihad”, ku fitoi një numër të madh trofesh dhe shndërroi Cityn në një nga klubet më dominues në Evropë.

Edhe pse ende nuk e ka konfirmuar zyrtarisht largimin, trajneri spanjoll ka dhënë sinjale të qarta në deklaratat e fundit.

“Gjëja më e rëndësishme është që kur të shikosh pas, ta bësh me buzëqeshje dhe të thuash: ‘Sa bukur ka qenë’. Kjo është ajo që ka më shumë rëndësi”, tha Guardiola.

Sipas raportimeve, klubi po përgatit edhe një paradë festive në Manchester për të nderuar Guardiolën pas triumfeve të këtij sezoni në FA Cup dhe Carabao Cup.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)