Bayern “rrëmben” dhe Kupën e Gjermanisë, Kane shkëlqen me 3 gola

Bayern Munich ka mbyllur në mënyrë perfekte një sezon dominues në futbollin gjerman, duke fituar finalen e Kupës së Gjermanisë me rezultat të pastër 3-0 ndaj Stuttgart në stadiumin olimpik të Berlinit.

Heroi absolut i mbrëmjes ishte sulmuesi anglez Harry Kane, i cili realizoi të tre golat e finales dhe i siguroi bavarezëve trofeun e parë të Kupës së Gjermanisë që nga viti 2020. Me këtë triumf, Bayern vendosi gjithashtu një rekord të ri me 139 gola të shënuar në të gjitha kompeticionet vendore gjatë sezonit.

Ndeshja nisi me ritëm të lartë nga Stuttgarti, që krijoi rastet e para me Deniz Undav dhe Maximilian Mittelstädt, por portieri Jonas Urbig reagoi saktë për të mbajtur portën të paprekur. Bayern u zgjua në fundin e pjesës së parë dhe iu afrua golit me Josip Stanišić, ndërsa fraksioni i parë u mbyll pa gola.

Në pjesën e dytë, bavarezët goditën menjëherë. Pas një aksioni të bukur nga Michael Olise në krahun e djathtë, Harry Kane u shkëput në zonë dhe me kokë dërgoi topin në rrjetë për 1-0.

Pavarësisht ndërprerjes së gjatë të ndeshjes për shkak të tymit dhe fishekzjarrëve në tribunat e Olympiastadion, Bayern ruajti kontrollin total. Në minutën e 80-të, Kane realizoi golin e dytë pas një rrotullimi të shpejtë në zonë dhe një goditjeje të saktë në cepin e portës.

Pak para fundit, Angelo Stiller preku topin me dorë në zonë dhe arbitri akordoi penallti për Bayernin. Nga pika e bardhë, Harry Kane kompletoi “hat-trick”-un e tij historik, duke u bërë lojtari i parë që shënon tre gola në një finale të Kupës së Gjermanisë që nga Robert Lewandowski në vitin 2012.

Ky ishte trofeu i 21-të i Bayern Munich në Kupën e Gjermanisë, duke konfirmuar edhe një herë dominimin absolut në futbollin gjerman. Nga ana tjetër, Stuttgart largohet pa trofe, por me ngushëllimin se sezonin e ardhshëm do të rikthehet në Champions League.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)