Nuk arritën kualifikimin në Kupën e Botës, Shqipëria dhe Kosova përgatisin sfidën “vëllazërore”

FSHF dhe FFK janë në bisedime për organizimin e këtij takimi, i cili do të shërbente si një provë e rëndësishme për të dy skuadrat, pas mbetjes jashtë evenimentit në SHBA, Meksikë dhe Kanada.

04.04.2026. 10:11

Nuk arritën kualifikimin në Kupën e Botës, Shqipëria dhe Kosova përgatisin sfidën “vëllazërore”

Pas venitjes së ëndrrës drejt Botërorit 2026, Shqipëria dhe Kosova shohin nga e ardhmja. Kombëtarja kuqezi dhe përfaqësuesja Dardane mund të përballen sërish në një ndeshje miqësore gjatë muajit qershor, në kuadër të një prej hapësirave ndërkombëtare për ndeshje testuese përpara startit të Kupës së Botës.

Burime pranë dy federatave bëjnë me dije se FSHF dhe FFK janë në bisedime për organizimin e këtij takimi, i cili do të shërbente si një provë e rëndësishme për të dy skuadrat, pas mbetjes jashtë turneut. Shqipëria u eliminua në gjysmëfinalet e “play-off” nga Polonia, ndërsa Kosova nuk arriti të bënte mrekullinë në finalen kundër Turqisë.

Deri më tani, Shqipëria dhe Kosova janë ndeshur tre herë, me bilancin që është në ekuilibër të plotë: 1 fitore për secilin ekip dhe 1 barazim. Ndeshja e parë u zhvillua më 13 nëntor 2015 dhe përfundoi në barazim 2-2: për Kosovën shënuan Celina dhe Rashani, ndërsa për Shqipërinë golat u realizuan nga Manaj dhe Rrahmani.

Më 29 maj 2018, Kosova triumfoi bindshëm 0-3, me dy gola nga Zenelit dhe një rrjetë të Zhegrovës. Ndërsa takimi i fundit, i luajtur më 11 nëntor 2020, u fitua nga Shqipëria me rezultatin 2-1, falë golave të Balajt dhe Uzunit, ndërsa për Kosovën realizoi Muriqi.

Shkarkoni aplikacionin Newsmax Balkans:

Komente (0)