Rëndohet bilanci i sulmit në Sidnei, 16 të vdekur dhe 40 të plagosur

Bilanci i viktimave nga sulmi i armatosur ndodhur në Sideni  gjatë festës hebraike të Hanukkah është rritur disa orë pas ngjarjes, me autoritetet australiane që konfirmojnë se të paktën 16 persona kanë mbetur të vdekur dhe 40 të tjerë të plagosur, përfshirë katër fëmijë që ndodhen në gjendje kritike në spital.

Ngjarja ndodhi rreth orës 18:45 me orën lokale, në plazhin e Bondi, të mbushur me qindra qytetarë dhe turistë, përfshirë pushues dhe sërfistë. Dëshmitarët raportuan se të shtënat zgjatën rreth 10 minuta, duke shkaktuar panik dhe frikë të madhe te njerëzit që vraponin për të shpëtuar, duke lënë pas sendet personale.

Shumë qytetarë mbetën të shtrirë në rërë ose bar pranë plazhit, ndërsa imazhe televizive treguan gjak dhe armë të braktisura në vendngjarje. Sipas dëshmitarëve, sulmuesit ishin dy persona të veshur me të zeza, të armatosur me pushkë gjysmëautomatike. Policia e quajti incidentin "akt terrorist" me motive të qarta antisemitike.

Një nga sulmuesit u vra, ndërsa tjetri ndodhet në spital në gjendje kritike. Autoritetet po hetojnë për përfshirjen e një sulmuesi të tretë dhe kanë identifikuar një pajisje shpërthyese të improvizuar në një makinë të lidhur me sulmuesit.

Një kalimtar, Ahmed al-Ahmed, u identifikua si hero, pasi u përpoq të rrëmbejë armën e njërit nga sulmuesit dhe shpëtoi shumë jetë. Kryeministri i Uellsit të Ri Jugor, Chris Means, dhe kryeministri australian Anthony Albanese e dënuan sulmin, duke e cilësuar si një akt mizor dhe një sulm ndaj gjithë komunitetit hebre në Australi.

Sulmi konsiderohet më i rëndë në Australinë moderne ndaj komunitetit hebraik dhe ndodh në një kohë tensioni, pas një serie sulmesh antisemite që shënuan Australinë që nga fillimi i luftës së Izraelit në Rripin e Gazës në tetor 2023.

Komuniteti hebraik në Australi është i vogël, por i integruar, me rreth 150,000 anëtarë, shumica në periferitë lindore të Sidneit, përfshirë Bodmin.

Alex Rivchin, bashkëdrejtor ekzekutiv i Këshillit Ekzekutiv të Hebrenjve australianë, përshkroi ngjarjen si një tmerr të paparë dhe theksoi se këshilltari i tij për median ishte një nga të plagosurit.

10:28 - Babë e bir janë autorë të masakrës në Sidnei, autoritetet: 6 armë zjarri u përdorën në sulm

Foto: Facebook

Babë e bir janë dy autorët e masakrës në Sidnei, ku nga sulmi me armë mbetën të vdekur 16 persona dhe 40 të tjerë u plagosën. Sipas asaj që u njoftua nga shefi i Policisë së Uellsit Jugor, autoritetet nuk po kërkojnë autorë të tjerë për ngjarjen e rëndë që ndodhi në plazhin Bondi, në perfieri të Sidenit.

Mediat australiane raportojnë se 50-vjeçari u vra nga policia në vendin e sulmit, ndërsa djali i tij 24-vjeçar mbetet në spital. Shefi i policisë thotë se 50-vjeçari kishte një leje për të përdorur armë dhe kishte në posedim gjashtë armë zjarri.

“Besohet se këto gjashtë armë zjarri u përdorën edhe në krimet në Bondi Beach”, thotë ai, duke shtuar se është i përkushtuar për të hetuar çështjen plotësisht.

Së fundmi, shefi i policisë thotë se dy oficerë policie të Uellsit të Ri Jugor mbeten në ruajtje në spital dhe se do të ketë një prani të shtuar policore në objektet e kultit.

Bilanci i viktimave është i madh, me të paktën 16 të vdekur dhe shumë të plagosur, në një sulm që autoritetet e përshkruan si terrorist dhe me motive të qarta antisemite.

Sipas mediave të huaja, dy fëmijë të moshës 10 dhe 12 vjeç humbën jetën, ndërsa  katër fëmijë janë të shtruar në spital, disa prej të cilëve në gjendje kritike.

Komente (0)