“Mospërputhje në zgjedhjet e 28 dhjetorit”, KQZ e Kosovës vendos rinumërim të plotë të votave

Një seri parregullsish serioze të konstatuara pas zgjedhjeve parlamentare të 28 dhjetorit 2025 në Kosovë, e ka detyruar Komisionin Qendror të Zgjedhjeve të marrë vendimin drastik për rinumërimin e plotë të votave në 28 komuna të vendit. Alarmi u ngrit pas kontrollit në disa zona, ku dolën në pah mospërputhje të mëdha me votat e kandidatëve për deputetë.

Situata më problematike u evidentua në Prizren, ku sipas të dhënave zyrtare rezulton se mbi 20 mijë vota ishin regjistruar gabim, ose mungonin në rezultatin përfundimtar të kandidatëve. Si pasojë, KQZ ka ndërmarrë masa disiplinore duke shkarkuar përfaqësuesit politikë të Komisionit Komunal Zgjedhor në Prizren.

Gjithashtu procesi i rinumërimit është zgjeruar edhe në komunat ku fillimisht ishte kryer vetëm një verifikim simbolik, prej 10 për qind i qendrave të votimit. Kryetari i KQZ-së, Kreshnik Radoniçi, theksoi se pavarësisht faktit që votat për partitë politike nuk shfaqin ndryshime domethënëse, tek votat për kandidatët është konstatuar një shkallë e lartë pasaktësie.

Në situatën e krijuar është përfshirë edhe organi i akuzës, për të hetuar nëse gjatë procesit zgjedhor janë kryer vepra penale. Rezultatet paraprake të zgjedhjeve vazhdojnë të nxjerrin Lëvizjen Vetëvendosje si fituese me më tepër se 51 për qind të votave. Kjo i jep forcës politike në pushtet rreth 57 mandate deputetësh. Ndërsa pritet rinumërimi i përgjithshëm i votave, kjo do të vonojë edhe konstituimin e Kuvendit dhe rrjedhimisht formimin e institucioneve të reja në Kosovë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)