Ish-kryeministri grek, Aleksis Cipras krijon parti të re, kërcënon Micotaqis me “Big Bang politik”

Ish-kryeministri grek, Alexis Tsipras, ka shpallur nisjen e një projekti të ri politik të quajtur “Ithaca”, duke sinjalizuar në mënyrë të tërthortë krijimin e një force të re progresive.

Në një fjalim të mbajtur në “Pallas”, Tsipras deklaroi se partitë aktuale progresive “e kanë mbyllur rrethin e tyre” dhe nuk përfaqësojnë më ankthin dhe nevojat e qytetarëve.

Tsipras kritikoi ashpër udhëheqjen aktuale të opozitës dhe bëri thirrje për “rivendosjen e fraksionit demokratik”, duke theksuar se sistemi politik aktual nuk është zgjidhja, por pjesë e problemit. Ai tha se dorëheqja e tij nga parlamenti kishte për qëllim hapjen e një rruge të re politike, por jo tërheqjen nga angazhimi publik.

Në qendër të vizionit të tij është vetëorganizimi nga baza, duke ftuar qytetarët të formojnë nisma në çdo qytet, lagje, vend pune apo studimi. Tsipras u shpreh se kjo lëvizje synon të thyejë “burokracitë e fjetura” dhe privilegjet e elitave politike.

“Do të kemi ftesa për të gjithë, por jo vende të rezervuara në klasin e parë”, theksoi ai.

Në vijim, Tsipras kërkoi ristrukturim rrënjësor të hapësirës progresive dhe krijimin e një partie të madhe, dinamike e gjithëpërfshirëse, të aftë për të qenë alternativë qeverisëse. Tsipras parashikoi “një tronditje të demokracisë” që, sipas tij, do të rikthejë qytetarët në politikë dhe do të forcojë institucionet demokratike.

Ish-kryeministri e mbylli fjalën duke bërë thirrje për një “Big Bang politik” që do të sjellë formacione të reja, të bazuara në pjesëmarrjen qytetare dhe vizionin për një Greqi më të drejtë dhe më moderne.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)