Erdogan ndjek stërvitjen e NATO-s në Izmir: Jemi për paqe, ushtria turke garanci sigurie për botën

Presidenti turk Rexhep Taip Erdogan mori pjesë në stërvitjen ndërkombëtare "Efes 2026" në Izmir, ku trupa ushtarake nga 50 vende, kryesisht anëtarëve të NATO-s po trajnohen për skenarë realë lufte.

Duke mbajtur një kapelë të stërvitjes, Erdogan përshëndeti audiencën e përzier të 1,300 ushtarëve nga e gjithë bota dhe shprehu gëzimin e tij që ishte me ta.

"Stërvitja Efes frymëzon besim tek miqtë tanë dhe zhgënjen ata që komplotojnë kundër Turqisë. Stërvitja po mbahet në një rajon ku Çaka Beu bëri histori në transportin detar duke themeluar një nga kantieret më të rëndësishme detare", tha Erdogan.

Ai po i referohej komandantit selxhuk që jetoi në shekullin e 11-të dhe sundoi një shtet vasal selxhuk me qendër në Izmir, ku ndodhet Izmiri i sotëm.

Erdogan iu drejtua edhe me një fjalim të pranishmëve duke vlerësuar ushtrinë turke dhe rolin e Ankarasë si një faktor kyç në epokën e re të aleancave. Ai tha se Turqia ka "një ushtri paqeje që nuk do të dëmtojë askënd përveç armiqve" dhe theksoi se "ruajtja e paqes kërkon përgatitje të mirë, vullnet dhe vendosmëri”.

“Ushtria turke mbart kujtimin e kombit dhe atdheut të saj, si dhe kujtimet dhe idetë e rajonit në të cilin ndodhet. Ushtria turke është një ushtri paqeje, një ushtri qetësie. Është një ushtri stabiliteti. Gjatë gjithë historisë së saj, ushtria turke nuk ka shkatërruar kurrë asnjë vend ku ka shkelur. Përkundrazi, e ka restauruar atë. Edhe në kushtet më të vështira, kjo ushtri nuk ka dëmtuar kurrë njerëz të tjerë përveç armiqve, nuk ka dëmtuar kurrë ndonjë krijesë, pemë apo qytet. Është një garanci sigurie për vendin dhe kombin e saj dhe garanton paqe dhe stabilitet edhe për rajonin, për botën”, u shpreh Erdogan.

Ai vuri në dukje gjithashtu se bota po kalon një periudhë të ndjeshme, ku paradigmat e sigurisë po ndryshojnë, reputacioni i së drejtës ndërkombëtare është dëmtuar dhe kërkohet një arkitekturë e re sigurie.

"Po krijohet një ekuilibër i ri, po ndërtohen aleanca të reja, megjithëse një rend i ri botëror ende mungon. Bota jonë po evoluon nga një status quo e projektuar nga një grusht fuqish të mëdha në një situatë shumëpolare me shumë aktorë. Turqia është në qendër të këtij procesi. Emri i saj po shfaqet si një nga aktorët e rëndësishëm të epokës së re. Përballë skenarëve pesimistë për të ardhmen, ne po përpiqemi ta bëjmë vendin tonë një lojtar kyç në çdo fushë, veçanërisht për paqen në rajon", theksoi ai, duke shtuar se është e nevojshme të mbahet ushtria e fortë dhe e pajisur mirë për të siguruar paqen dhe sigurinë në një rajon të vështirë.

Në një mesazh indirekt për Izraelin, Erdogan tha se “Turqia do të vazhdojë të mbështesë paqen dhe stabilitetin kundër atyre që investojnë në luftë dhe kaos”.

“Ne do të mbrojmë me vendosmëri vlerat e përbashkëta të njerëzimit kundër rrjeteve gjenocidale që masakrojnë fëmijë, gra dhe të moshuar, në Gaza, Liban dhe gjetkë në rajonin tonë. Historia është plot me shembuj të atyre që fituan duke krijuar miqësi me popullin turk dhe shembuj të pasojave për ata që ushqejnë armiqësi ndaj turqve”, theksoi lideri turk.

Sakaq, gjatë stërvitjes ‘Efes 2026’, Forcat e Armatosura Turke zhvilluan demonstrime dhe shfaqën produktet më të fundit të industrisë së mbrojtjes të vendit. Stërvitja, e emëruar sipas qytetit të lashtë të Efesit në Izmirin e sotëm, filloi më 20 prill në lagjen Doganbey të komunës Seferihisar të qytetit në bregdetin e Egjeut.

50 vende, nga anëtarët e NATO-s deri te Libia dhe Siria, morën pjesë në stërvitje, që ishte më e madhja e kombinuar me zjarr të vërtetë që është zhvilluar ndonjëherë në Turqi.

Fokusi gjatë stërvitjes ishte te “Kupola e Çeliktë”, sistemi shumështresor i mbrojtjes ajrore i Turqisë. Të gjithë elementët e sistemit të zhvilluar nga Aselsan u shfaqën në mënyrë të dukshme gjatë stërvitjes, me pamje nga Deti Egje në një vijë të ngushtë bregdetare, pranë një banderole ku shkruhej “Çelik Kubbe”.

Sistemi kombinon platformën me rreze të gjatë veprimi Siper me Hisar-A, Hisar-O dhe Sungur në një konfigurim shumështresor të projektuar për të kapur kërcënime që variojnë nga raketat lundruese deri te dronët komercialë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)