Abuzimi 33 milionë lekë me tenderat “përndjek” Elvis Roshin, ish-kryebashkiaku i Kavajës paraqitet në SPAK

Dosja e 10 viteve më parë për tenderat e firmosur në kohën kur drejtonte Bashkinë e Kavajës, ende e përndjek Elvis Roshin. Ish-kryebashkiaku i Kavajës u paraqit mëngjesin e sotëm në SPAK bashkë me avokatin e tij.

Newsmax Balkans mëson se Roshi është marrë i pandehur për kallëzimin e bërë ndaj tij nga Kontrolli i Lartë i Shtetit për parregullsi me tenderat për rikonstruksionin e qendrës së qytetit dhe ndërtimin e disa akseve rrugore, që dyshohet se kanë shkaktuar një dëm ekonomik prej 33 milionë lekësh.

Kallëzimi i KLSH ndaj Elvis Roshit ishte bërë 10 vite më parë, në shtator të vitit 2015, në Prokurorinë e Kavajës. Sipas dosjes, ish-kryebashkiaku dhe 10 zyrtarë të tjerë kanë kryer shkelje që janë zbuluar nga një audit i kryer në Bashkinë e Kavajës për periudhën janar 2013-dhjetor 2014.

Të paktën 12 tenderë janë konstatuar nga KLSH si të dyshimtë, të zhvilluar kryesisht për rikonstruksionin e qendrës së qytetit, të disa rrugëve lidhëse dhe mbjelljen e pemëve dekorative.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)