Tenderat e manipuluar të AKSHI, mbeten nën arrest Karçanaj dhe zv/drejtoresha

Gjykata e Posaçme ka lënë në fuqi masat e sigurimit të vendosura ndaj gjashtë personave të dyshuar në hetimin për manipulim tenderash në AKSHI, pas një procesi të tejzgjatur verifikimi mbi kushtet e shpalljes së tyre në mungesë.

Trupa gjykuese konfirmoi masën e arrestit shtëpiak për drejtoreshën e përgjithshme të AKSHI-t, Mirlinda Karcanaj,  e dyshuar për shkelje të barazisë në tendera, vepër e kryer në bashkëpunim në kuadër të një grupi kriminal. E njëjta masë u la në fuqi edhe për Hava Delibashin, zëvendësdrejtoreshë në AKSHI, ndaj së cilës rëndojnë të njëjtat akuza.

Ndërkohë, për zëvendësdrejtorin e Policisë së Tiranës, Erjon Ismailajn, gjykata ndryshoi qëndrim, duke hequr masën e ndalimit për të dalë jashtë vendit, por duke lënë në fuqi pezullimin nga detyra.

Në fuqi mbetën gjithashtu masat e sigurimit ndaj tre biznesmenëve, të cilët përballen, përveç akuzave të tjera, edhe me dyshime për pastrim parash.

Hetimi gati njëvjeçar nga Prokuroria e Posaçme ka zbuluar ekzistencën e një grupi kriminal që vepronte për përcaktimin e fituesve të tenderave në AKSHI. Në dosje përfshihet edhe dëshmia e një biznesmeni, i cili dyshohet se, për shkak të konkurrencës së paligjshme, ju hoq liria nga persona të veshur me jelekë me logo false të BKH-së dhe që, duke përdorur një automjet me logo policie, e kanë kanosur që të mos ankohej për parregullsitë në procedurat e tenderimit.

Prokuroria thekson se të dyshuarit u kanë kërkuar subjekteve pjesëmarrëse të heqin dorë nga ankimet, duke i hapur rrugë kompanive të paracaktuara. Sipas hetimeve, shqyrtimi i ankesave mund të sillte ndryshimin e renditjes së fituesve, çka do të rrëzonte skemat e dyshuara të manipulimit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)