Frymëzuar nga Leonardo da Vinci, në “Milano-Cortina 2026” edhe Mariah Carey e Tom Cruise

Italia është gati të magjepsë botën. Të premten, më 6 shkurt 2026 do të hapet zyrtarisht Olimpiada Dimërore “Milano-Cortina 2026”. Ceremonia, e planifikuar të nisë në orën 20:00, premton të thyejë çdo skemë tradicionale.

Skena kryesore do të jetë stadiumi “San Siro” në Milano. Megjithatë, nuk do të jetë një ceremoni klasike e mbyllur brenda një impianti: për herë të parë në histori, ceremonia e hapjes do të jetë vërtet e ndarë dhe e përbashkët, një ngjarje që lidh metropolin e Milanos me Cortina d’Ampezzo, Livigno dhe Val di Fiemme.

Koncepti bazohet në një rrëfim kolektiv, që shuan distancat gjeografike dhe bën protagonistë atletët kudo që ndodhen. Simboli më i fuqishëm i kësaj lidhjeje do të jetë ndezja e dy flakëve olimpike, njëkohësisht në Milano dhe në zemër të Dolomiteve. “Pishtarët”, me peshë sa një kamion dhe të veshura me mijëra drita me konsum të ulët energjie, janë struktura lëvizëse që hapen dhe mbyllen si një frymëmarrje.

Dizajni i tyre i bën homazh Leonardo da Vinçit, duke rikujtuar motivet e ndërthurura që simbolizojnë ekuilibrin mes njeriut dhe natyrës. Një vepër inxhinierike që shikon drejt së ardhmes, pa harruar rrënjët artistike italiane.

Muzika do të jetë protagoniste absolute e mbrëmjes, me një kombinim yjesh ndërkombëtarë dhe ikonash italiane. Në skenë pritet të ngjiten Mariah Carey, Andrea Bocelli, Laura Pausini dhe Ghali, në një përzierje që bashkon pop-in global, muzikën klasike dhe tingujt bashkëkohorë.

Një tjetër emër i madh që pritet të marrë pjesë në ceremoninë e hapjes është Tom Cruise, ambasador i Olimpiadës “Los Angeles 2028” dhe i ftuar nderi i eventit. Aktori amerikan do të jetë më 6 shkurt në Milano për ceremoninë dhe fansat shpresojnë të ketë rezervuar një performancë akrobatike në stilin “Mission Impossible”, ashtu si në në ceremoninë e mbylljes së Lojërave të Parisit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)