Të dyshuar për vrasje në Dibër, në pranga binjakët nga Gjirokastra

Dy vëllezër dyshohet se janë të përfshirë në vrasjen e një personi në Dibër në vitin 2018. Ata janë vënë në pranga gjatë operacionit policor të përbashkët mes Dibrës dhe Gjirokastrës.

Vëllezërit janë të dy banues në Gjirokastër, dhe gjatë kontrollit u është gjetur dhe armë. Aktualisht policia po heton nëse armët janë përdorur në ngjarjen e 2018-tës apo ndonjë ngjarje tjetër. 

NJOFTIMI I POLICISE

Operacioni, i koduar “Twins”, çoi në arrestimin e dy shtetasve, K. K., 39 vjeç, dhe K. K., 39 vjeç, të dy banues në Gjirokastër. Gjatë kontrollit të banesave të tyre, autoritetet sekuestruan 3 armë zjarri, përfshirë 2 kallashnikovë dhe 1 pushkë, një thikë, 3 krehëra, municion luftarak, një maskë dhe 3 aparate celularë.

Armët e sekuestruara do të dërgohen në Institutin e Policisë Shkencore për ekzaminime të mëtejshme, për të verifikuar nëse ato janë përdorur në vrasjen e vitit 2018 ose në ngjarje të tjera kriminale.

Hetimet e mëtejshme janë duke u udhëhequr nga Prokuroria e Dibrës, e cila ka nisur një punë intensive për zbardhjen dhe dokumentimin e plotë ligjor të kësaj vrasjeje. Po ashtu, po vijon puna për kapjen dhe arrestimin e personave të tjerë të dyshuar për këtë ngjarje.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)