Vrasja për parkimin në Kavajë, arrestohet autori, sekuestrohet dhe arma e krimit

Policia e Kavajës ka arrestuar pas disa orësh kërkime 47 vjeçarin Landi Puja, i cili mesditën e së shtunës vrau me thikë shtetasin Alket Isufi.

Efektivët blu arritën të lokalizojnë vendin ku fshihej Puja, dhe falë ndërhyrjes së menjëhershme arritën ta neutralizonin. Gjatë aksionit u sekuestrua dhe thika me të cilin 47 vjeçari kreu krimin e rëndë.

Ngjarja ndodhi rreth orës 14:00 të së shtunës në lagjen nr.3 të qytetit kur autori dhe viktima dyshohet se fillimisht patën një debat të ashpër për motive banale.

Viktima, Alket Isufi, dyshohet se kishte parkuar makinën përpara banesës së autorit të dyshuar, Landi Puja. Ky i fundit ka dalë nga shtëpia dhe i ka kërkuar të largonte automjetin.

Debati mes tyre është përshkallëzuar me tone të ashpra dhe në kulmin e konfliktit, Puja dyshohet se ka nxjerrë një mjet prerës, duke e goditur dy herë 47-vjeçarin në zonën e kraharorit.

I plagosuri u transportua me urgjencë në spital, por nuk ka arritur t’u mbijetojë plagëve të marra.

Grupi hetimor, nën drejtimin e Prokurorisë, vijon punën për sqarimin e plotë të rrethanave dhe dokumentimin ligjor të rastit. Materialet procedurale iu referuan Prokurorisë së Durrësit, për veprime të mëtejshme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)