Koçiu: Policia veproi sipas ligjit në protestë, i mituri po qëllonte efektivët me gurë

Ministrja e Brendshme, Albana Koçiu ka reaguar në Kuvend lidhur me protestën e fundit të opozitës dhe ngjarjet e shënuara gjatë saj, përfshirë shoqërimin në komisariat të një 14-vjeçari.

Duke iu referuar protestës së së shtunës, ministrja deklaroi se Policia e Shtetit e kreu detyrën në përputhje të plotë me ligjin dhe standardet profesionale. Sipas saj, nuk ka pasur dhunë nga ana e policisë ndaj protestuesve, ndërsa efektivët janë përballur me sulme të dhunshme, përfshirë përdorimin e molotovëve, mjeteve piroteknike dhe sendeve të forta, çka solli plagosjen e 11 punonjësve të policisë.

Në lidhje me rastin e të miturit, ministrja sqaroi se 14-vjeçari është konstatuar duke hedhur gurë dhe sende të forta drejt forcave të rendit. Për arsye sigurie, si për efektivët ashtu edhe për vetë të miturin, ai është shoqëruar për verifikim.

Sipas Koçiut, i mituri nuk është trajtuar në asnjë moment në mënyrë të paligjshme apo çnjerëzore dhe ka qëndruar në ambiente të përshtatshme, në përputhje me standardet për mbrojtjen e fëmijëve.

“Policia ka vepruar sipas rregullave, ka bërë thirrje të vazhdueshme për ruajtjen e qetësisë, kur këto u shpërfillën, u ndërmorrën masa për shpërndarjen e turmës sipas rregullores. Akuzat janë të pavërteta dhe të pabazuara. Çdo veprim është kryer sipas ligjit. E drejta për protestë është kushtetuese, por dhuna nuk është një e drejtë.

Dua të ndalem te rasti i diskutuar për të përdorur opinionin publik dhe manipulimin politik. Rasti i shoqërimit të një të mituri, gjatë veprimeve të policisë së shtetit, u konstatua i mituri duke gjuajtur me gurë dhe sende të forta drejt policëve. Për të mbrojtur jetën e policëve dhe vetë të miturit, ai u mor për verifikim. Bëhej fjalë për një 14-vjeçar, në asnjë moment nuk është trajtuar në mënyrë të paligjshme apo çnjerëzore. Ka qëndruar në një ambient të përshtatshëm në përputhje me standardet për mbrojtjen e të miturve. Askush nuk është mbi ligjin, askush nuk duhet të përdorë fëmijët për të justifikuar dhunën”-u shpreh Koçiu.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)