Nën hetim Flamur Noka e Xhelal Mziu, u përplasën me dy persona që i akuzuan si policë

Policia e Tiranës ka nisur një hetim ndaj dy deputetëve demokratë Noka dhe Xhelal Mziu pas kallëzimit të bërë nga dy qytetarë, për dhunë prej tyre.

Dy qytetarët Krenar Metaj dhe Totem Toraj deklaruan në polici se dy deputetët kishin ushtruar dhunë ndaj tyre, teksa po qëndronin në bulevard gjatë protestës së opozitës më 20 shkurt.

Gjatë protestës, kamerat kapën momentin e incidentit ku dy deputetët u përplasën me këta dy qytetarë, duke pretenduar se ishin efektivë policie të veshur civilë.

“Specialistët për Hetimin e Krimeve kundër Jetës dhe Pronës referuan materialet në Prokurori, ku nisi procedimi penal për shtetasit F. N. dhe Xh. M., pasi ndaj tyre kanë kallëzuar shtetasit K. M. dhe T. T. se, më datë 20.02.2026, gjatë tubimit të zhvilluar nga subjekti politik Partia Demokratike, janë shtyrë dhe goditur prej tyre”, thuhet në njoftimin e Policisë.

Gjatë protestës së opozitës u shënuan disa akte dhune, ku mbështetësit e PD goditën me bomba molotov dhe  sende të forta Kryeministrinë, Parlamentin, por edhe efektivët e policisë që mbronin ato.

Opozita më pas akuzoi policinë për dhunë ndaj protestës dhe për shoqërimin e mbështetësve të saj në komisariat pa asnjë motiv.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)