“Opozita nuk mund të sillet si Rama”, Salianji kundër ndryshimeve në statutin e PD

Zhvillimet e fundit brenda PD dhe ndryshimet e paralajmëruara në statutin e partisë gjatë mbledhjes së Kryesisë, kanë sjellë reagimin e ish-deputetit të Partisë Demokratike, Ervin Salianji. Qëndrimin ai e shprehu nëpërmjet një statusi në rrjetin social “X”. Aty akuzoi se opozita po bën gabimin që po ndjek të njëjtin model, për të cilin kritikon qeverinë.

Ai u shpreh se ndryshimet e njëanshme në rregullat dhe statutet e partisë përbëjnë uzurpim dhe dëmtojnë besimin e demokratëve. Sipas tij, Partia Demokratike nuk mund të hapë rrugë për ndryshime të njëanshme në “kushtetutën” e saj politike.

“Nuk ka shërbim më të madh për Edi Ramën sesa të sillesh dhe të veprosh njësoj si ai. Opozita nuk mund të bjerë në të njëjtën kurth me ndryshim rregullash dhe sulm ndaj ndërkombëtarëve. Partia Demokratike nuk mund të hapë rrugë për ndryshime të njëanshme në Kushtetutën e partisë dhe në Statut”, tha Salianji.

Ai thekson se Neni 46 i statutit është i qartë dhe nuk mund të anashkalohet për interesa të momentit. Sipas Salianjit, nëse opozita fillon të sillet si pushteti që kritikon, atëherë rrezikon të dëmtojë jo vetëm veten, por edhe besimin e qytetarëve tek alternativa politike.

“Sot po shohim të njëjtën logjikë që kemi denoncuar tek qeveria: uzurpim të rregullave, shkatërrim të degëve, përjashtim të demokratëve, sikur Partia Demokratike të ishte pronë private e disa individëve dhe jo një parti e ndërtuar mbi vullnetin e demokratëve”, shkruante Salianji.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)