Ndodh për herë të parë, Sali Berisha mungon në Foltoren para Kryeministrisë

Foltorja e radhës e opozitës para Kryeministrisë është zhvilluar këtë të hënë pa praninë e kreut të Partisë Demokratike, Sali Berisha, i cili zakonisht ka qenë folësi kryesor në këto tubime.

Ndryshe nga herët e tjera, Berisha nuk mori pjesë në foltoren e organizuar para godinës së qeverisë, pasi ndodhej në një iftar në Kavajë. Në mungesë të tij, protestën dhe foltoren e drejtoi Sekretari i Përgjithshëm i PD-së, Flamur Noka, i cili mbajti edhe fjalimin përmbyllës para mbështetësve të opozitës.

Në tubim ishin të pranishëm edhe figura të tjera të larta të opozitës, mes tyre nënkryetarët e Partisë Demokratike, Gazment Bardhi dhe Agron Gjekmarkaj, si dhe përfaqësues të tjerë të kësaj force politike.

Partia Demokratike prej disa muajsh ka nisur organizimin e një serie foltoresh dhe protestash që zhvillohen çdo të hënë para Kryeministrisë, si pjesë e aksionit politik kundër qeverisë.

Ndërkohë, opozita ka paralajmëruar edhe një protestë kombëtare që pritet të zhvillohet më 22 mars, e cila sipas drejtuesve të saj do të shënojë një tjetër moment të mobilizimit kundër qeverisë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)