Serbia dhe Kina thellojnë bashkëpunimin strategjik në teknologjitë hapësinore

Ministri i Bujqësisë i Serbisë, Dragan Glamoqiç, deklaroi të mërkurën në Beograd se Kina dhe Serbia po e thellojnë partneritetin strategjik përmes bashkëpunimit në fushën e teknologjive ajrore dhe hapësinore.

“Ato janë bërë themel i industrisë moderne dhe i transformimit digjital dhe hapin hapësirë për zgjidhje që kanë rëndësi afatgjatë shoqërore dhe ekonomike”, tha Glamoqiç gjatë seminarit të parë kinezo-serb kushtuar teknologjive hapësinore.

Sipas njoftimit të Ministrisë së Bujqësisë, zbatimi i këtyre teknologjive në industri dhe bujqësi mund të përmirësojë sigurinë ushqimore, të kontribuojë në përdorimin racional të burimeve dhe në rritjen e qëndrueshmërisë së sektorit bujqësor. Në këtë takim në Beograd u mbajt edhe ceremonia e hapjes së Qendrës së Përbashkët të Inovacionit për teknologjitë ajrore dhe hapësinore kinezo-serbe.

“Vëzhgimi satelitor, bujqësia precize, sistemet e avancuara për parashikimin e rreziqeve klimatike dhe platformat digjitale për mbështetjen e prodhuesve do ta avancojnë prodhimin bujqësor vendor”, tha Glamoqiç. Ai shtoi se Serbia disponon kuadro cilësore profesionale, institucione kërkimore dhe bazë të zhvilluar bujqësore, ndërsa Kina ka zgjidhje teknologjike të avancuara dhe përvojë në zbatim.

Serbia është kandidate për anëtarësim në Bashkimin Evropian që nga viti 2012, por që nga ardhja në pushtet e Partisë Progresive Serbe dhe Aleksandar Vuçiçit ka zhvilluar bashkëpunim të ngushtë me Kinën, për çka Brukseli e ka paralajmëruar disa herë për harmonizimin e politikës së jashtme me atë evropiane.

Dy vendet kanë marrëveshje për bashkëpunim strategjik dhe tregti të lirë, ndërsa gjatë vizitës së presidentit kinez Xi Jinping në Beograd në maj 2024 u nënshkruan 28 marrëveshje dypalëshe, përfshirë marrëveshjen për ekstradim dhe forcimin e bashkëpunimit në fushën e mediave.

Kina është investitorja e dytë më e madhe në ekonominë e Serbisë, pas BE-së, me 698 milionë euro investime në vitin 2024, ndërsa shkëmbimi tregtar në dhjetë muajt e parë të këtij viti arriti në 5.7 miliardë euro, megjithëse eksporti serb në Kinë mbetet disa herë më i ulët.

Bashkëpunimi mes dy vendeve është i theksuar edhe në fushën ushtarake, ku Ushtria e Serbisë përdor dronë dhe sisteme kineze të mbrojtjes kundërajrore, duke e bërë Serbinë vendin e parë evropian që ka blerë sistemet FK-3 dhe HQ-17.

Presidenti i Serbisë, Aleksandar Vuçiç, ka vizituar disa herë Pekinin gjatë dekadës së fundit dhe së fundmi ka njoftuar se po përgatitet një vizitë e re zyrtare. “Kam qenë shumë herë atje, por ato ishin vizita pune. Kjo do të jetë një vizitë zyrtare”, tha Vuçiç.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)